#Trending – மனைவிக்கு நிலாவில் இடம் வாங்கிய கணவர்; பின்னணி என்ன?

உலகில் மனைவிக்கு, அவர்களது கணவர்கள் என்னவெல்லாமோ பரிசளித்துக் கேள்விப் பட்டிருப்போம். ஆனால், இப்படியொரு பரிசை எந்தக் கணவராலும் யோசித்துக் கூட பார்த்திருக்க முடியாது. ராஜஸ்தானைச் சேர்ந்த தர்மேந்திர அனிஜா என்பவர், தன் மனைவியான சப்னா அனிஜாவுக்கு நிலாவில் மூன்று ஏக்கர் நிலம் வாங்கி பரிசாக தந்துள்ளார். தங்களது 8வது திருமண நாளைக் கொண்டாடும் வகையில் தர்மேந்திரா, இப்படிப்பட்ட பரிசைத் தந்துள்ளார்.

இது குறித்து தர்மேந்திரா அனிஜா, ‘டிசம்பர் 24 ஆம் தேதி எங்களது திருமண நாளாகும். இந்த நாளைக் கொண்டாடும் வகையில் சப்னாவுக்கு எதாவது செய்ய வேண்டும் என்று யோசித்தேன். பொதுவாக அனைவரும் கார், நகை என வாங்கி பரிசாக கொடுப்பார்கள். ஆனால், நான் வித்தியாசமாக எதாவது செய்ய வேண்டும் என்று எண்ணினேன். அந்த எண்ணத்தினால்தான் நிலாவில் அவருக்கு இடம் வாங்கினேன்’ என்றார்.

உலகைத் தவிர வேறு எந்த விண்வெளி பிரதேசத்திலும் இடம் வாங்குவது என்பது சட்டப்படி செல்லுபடியாகாது. இருந்தாலும் இப்படி வேற்று கிரகங்களிலோ, இடங்களிலோ நிலம் வாங்குவதை ‘ஊக்குவிக்கும்’ வகையில் சில நிறுவனங்கள் செயல்படுகின்றன. அப்படியொரு நிறுவனத்தின் மூலமே தர்மேந்திரா, நிலாவில் இடம் வாங்கி பரிசளித்துள்ளார்.

கணவரின் சர்ப்ரைஸ் குறித்து சப்னா, ‘இப்படியொரு பரிசை நான் எதிர்பார்க்கவில்லை. இது குறித்தான கொண்டாட்ட நிகழ்ச்சியில் தர்மேந்திரா, எனக்கு நிலாவில் வாங்கியுள்ள இடத்துக்கான பத்திரத்தைப் பரிசாக தந்தார். இது மிகவும் மகிழ்ச்சியான உணர்வு’ என்றார்.

என்னதான் மனைவி மீது பாசமிருந்தாலும், இப்படியா என்று இந்த டிரெண்டிங் கதையைக் கேட்டு நெட்டிசன்ஸ் பொங்கியுள்ளனர். ரூம் போட்டு யோசிப்பாங்களோ..?