டெஸ்லா சைபர் டிரக் கார் மான்செஸ்டர் கோவை சாலைகளில் வலம் வந்தது

தமிழகத்தின் மான்செஸ்டர் என பெருமையுடன் அழைக்கப்படும் கோயம்புத்தூர் மாநகரத்தின் சாலைகளில் வலம் வந்த ஒரு வாகனம், சாலையில் சென்ற பொதுமக்கள் அனைவரின் கவனத்தையும் ஈர்த்து அவர்களின் முகங்களில் ஆச்சர்ய ரேகைகளை பரவ விட்டது இப்பொது பேசுபொருறாகி வருகிறது.

உலகப் புகழ்பெற்ற அமெரிக்க தொழிலதிபர் எலான் மஸ்க்கின் டெஸ்லா நிறுவன தயாரிப்பான ‘சைபர் டிரக்’என்ற நவீன கார் கோவையின் முக்கிய சாலைகளில் முதன்முறையாக தோன்றிய போது விண்வெளி ஓடத்தை நினைவூட்டும் வகையிலான அதன் விநோத வடிவமைப்பும், துருப் பிடிக்காத இரும்பு கவசத்தால் உருவாக்கப்பட்டுள்ள உடலமைப்பும், ஹாலிவுட் திரைப் படங்களில் காணப்படும் எதிர்கால கற்பனை வாகனம் ஒன்று நம்மூர் சாலையில் பவனி வருவது போன்ற உணர்வை பார்க்கும் பொதுமக்களிடையே ஏற்படுத்தியது.

இந்தியாவில் ஏற்கனவே முறையாகப் பதிவு செய்யப்பட்டுள்ள இந்த மின்சார கார் சமீப காலமாக சென்னை மற்றும் மும்பை போன்ற பெருநகரங்களில் மட்டுமே அரிதாகக் காணப்பட்டது தற்போது கோவை மாநகரிலும் காட்சியளித்துள்ளது. சுமார் ரூ.5 கோடி மதிப்புள்ள இந்த டெஸ்லா சைபர் டிரக், துப்பாக்கித் தோட்டாக்களையும் தாங்கும் வல்லமை கொண்டது.  இந்த வாகனத்தின் இந்த நகர்வலம் கோவை  நகரத்தின் சர்வதேச தரத்தை வெளிப்படுத்துவதாக இருப்பதாக சமூக வலைதளங்களில் பலரும் கருத்து தெரிவித்து வருகின்றனர்.