ஓபிஎஸ் மனைவி மறைவு: முதல்வர் ஸ்டாலின் நேரில் அஞ்சலி!

தமிழக சட்டசபையின் எதிர்க்கட்சி தலைவர் பன்னீர்செல்வம் அவர்களின் மனைவி விஜயலட்சுமி உடல் நலக்குறைவு காரணமாக இன்று காலமானார். இதனையடுத்து அவருக்கு அதிமுக பிரமுகர்கள் மற்றும் தொண்டர்கள் இரங்கல் தெரிவித்து வருகின்றனர்

அந்த வகையில் தமிழக முதல்வர் முக ஸ்டாலின் அவர்கள் இரங்கல் செய்தி ஒன்றை வெளியிட்டுள்ளார். அதில் அவர் கூறியிருப்பதாவது: அதிமுக ஒருங்கிணைப்பாளரும் சட்டப்பேரவை எதிர்க்கட்சித் துணைத் தலைவருமான அண்ணன் திரு ஓ பன்னீர்செல்வம் அவர்களின் துணைவியார் திருமதி விஜயலட்சுமி அவர்கள் மாரடைப்பால் காலமானார் என்ற செய்தி அறிந்து மிகுந்த அதிர்ச்சியும் வேதனையும் அடைந்தேன். இல்ல துணையை பிரிந்து வாடும் அண்ணன் திரு ஓ பன்னீர்செல்வம் அவர்களுக்கும் அவரது குடும்பத்தினர் மற்றும் உறவினர் அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன் என்று கூறியுள்ளார்,

மேலும் அதிமுக ஒருங்கிணைப்பாளர் பன்னீர்செல்வத்தின் மனைவி விஜயலட்சுமி உடலுக்கு முதலமைச்சர் முக ஸ்டாலின் நேரில் அஞ்சலி செலுத்தினார் என்பதும் குறிப்பிடத்தக்கது.

திரைப்பட இயக்குனர் பாரதிராஜா தனது டுவிட்டர் பக்கத்தில் ’முன்னாள் முதல்வரும் அண்ணா திராவிட முன்னேற்ற கழக தலைமை ஒருங்கிணைப்பாளரும் மதிப்பிற்குரிய திரு பன்னீர்செல்வம் அவர்களின் மனைவி திருமதி விஜயலட்சுமி அவர்களின் மறைவு செய்தியை பேரதிர்ச்சியாக இருந்தது என்று குறிப்பிட்டுள்ளார்

மேலும் கவிஞர் வைரமுத்து தனது டுவிட்டர் பக்கத்தில் கூறியிருப்பதாவது:

அன்புச் சகோதரர்
ஓ.பன்னீர்செல்வத்தின் துணைவியார்
திருமதி விஜயலட்சுமி அம்மையார்
மறைந்த செய்தி
வருந்த வைத்தது.

அவருக்கும், குடும்பத்தார்க்கும்
உறவுகள் அனைவர்க்கும்
என் ஆழ்ந்த இரங்கல்.

காலமே!
அவர்தம் துயரத்தையும்
கண்ணீரையும்
தொட்டுத் துடைத்துவிடு.