ரூ.2.87 லட்சம் கோடி RBI டிவிடெண்ட்.. மாநிலங்களுக்கு பங்கு இல்லையா? மத்திய அரசை கேள்வி கேட்ட முதல்வர்!

இந்திய ரிசர்வ் வங்கி (RBI) மத்திய அரசுக்கு சுமார் ரூ.2.87 லட்சம் கோடி டிவிடெண்ட் வழங்கியிருப்பது கூட்டாட்சி அமைப்பு மற்றும் பொருளாதார நிலைத்தன்மை குறித்து புதிய விவாதத்தை ஏற்படுத்தியுள்ளது. இந்த விவகாரத்தில் பஞ்சாப் மாநில நிதியமைச்சர் Harpal Singh Cheema கடுமையான கவலை வெளியிட்டுள்ளார்.

ரிசர்வ் வங்கியின் மொத்த வருவாய் சுமார் ரூ.4 லட்சம் கோடி இருக்கும் நிலையில், அதில் பெரும் பகுதியை மத்திய அரசு டிவிடெண்டாக பெற்றிருப்பது RBI வரலாற்றிலேயே மிகப்பெரிய தொகைகளில் ஒன்றாகக் கருதப்படுகிறது.

இதுகுறித்து கருத்து தெரிவித்த அமைச்சர் ஹர்பால் சிங் சீமா, “சாதாரண மக்கள் ஏற்கனவே எரிபொருள் விலை உயர்வு, பணவீக்கம் மற்றும் சிக்கன நடவடிக்கைகளின் அழுத்தத்தில் இருக்கின்றனர். இப்படியான சூழலில் RBI-யிலிருந்து இத்தனை பெரிய தொகையை மத்திய அரசு பெறுவது மூன்று முக்கிய கேள்விகளை எழுப்புகிறது” என்றார்.

அவர் மேலும் கூறுகையில், “இந்த வகையான அசாதாரண வருவாய்கள் மாநிலங்களுடன் பகிரப்படும் வரி தொகை (divisible pool) கணக்கில் சேர்க்கப்படுவதில்லை. உலகளாவிய பொருளாதார சிக்கல்கள் மற்றும் விநியோக பாதிப்புகள் மத்திய அரசுக்கு சவாலாக இருந்தால், அதே சவால்களை மாநில அரசுகளும் சந்தித்து வருகின்றன. எனவே கூட்டாட்சி மற்றும் நிதி நியாயத்தின் அடிப்படையில் இந்த வருவாயிலும் மாநிலங்களுக்கு பங்கு வழங்கப்பட வேண்டும்” என்று வலியுறுத்தினார்.

மேலும் RBI-யின் நிதி வலிமை குறித்தும் அவர் எச்சரிக்கை விடுத்தார். “நிதிப் பற்றாக்குறையை குறைப்பது முக்கியம் தான். ஆனால் அதற்காக RBI-யின் நிதி சக்தி மற்றும் நிறுவன வலிமையை பலவீனப்படுத்தக் கூடாது. பொருளாதார நெருக்கடிகள் வரும் போது RBI தான் நாட்டின் முக்கிய பாதுகாப்பு கவசமாக செயல்படுகிறது” என்றார்.

“RBI-யின் கையிருப்புகளை அதிகமாக பயன்படுத்துவது, நீண்டகால பொருளாதார நிலைத்தன்மையையும் நாட்டின் நிதி பாதுகாப்பையும் பாதிக்கக்கூடும்” என்றும் அவர் குறிப்பிட்டார்.

உலகளாவிய நிதி சூழல் மற்றும் நாணய சந்தைகள் இன்னும் அழுத்தத்தில் இருக்கும் நிலையில், RBI அதிக நிதி கையிருப்புகளை தக்க வைத்திருக்க வேண்டும் என்றும் அமைச்சர் தெரிவித்தார். “நிதி நிலைத்தன்மையை பாதுகாக்க RBI போதுமான கையிருப்புகளையும் கொள்கை சுதந்திரத்தையும் வைத்திருக்க வேண்டும்” என்றார்.

இறுதியாக, RBI-யின் தன்னாட்சி மற்றும் நம்பகத்தன்மையை பாதுகாக்க வேண்டும் என RBI ஆளுநரிடம் அவர் வேண்டுகோள் விடுத்தார். “பலவீனமான மத்திய வங்கியுடன் இந்தியா வலுவான மற்றும் நிலையான பொருளாதாரத்தை உருவாக்க முடியாது” என்றும் அவர் கூறினார்.