ரோஜாவை ஸ்பெஷலாக கவனித்த ஜெகன் மோகன் ரெட்டி: புதிய பதவியை ஏற்றுக்கொண்டார்!

நடந்து முடிந்த ஆந்திர சட்டசபை தேர்தலில் ஜெகன் மோகன் ரெட்டியின் ஒய்எஸ்ஆர் காங்கிரஸ் கட்சி மாபெரும் வெற்றிபெற்று ஆட்சியை கைப்பற்றியது. இதனையடுத்து ஜெகன் மோகன் ரெட்டி ஆந்திர முதல்வராகப் பதவியேற்றார்.

இந்த தேர்தலில் ஜெகன் மோகன் ரெட்டிக்கு ஆதரவாக தீவிர பிரச்சாரத்திலும் தேர்தல் பணியிலும் ஈடுபட்டார் நடிகை ரோஜா. மேலும் அரசியலில் ஜெகன் மோகன் ரெட்டிக்கு மிகவும் பக்கபலமாக இருந்து வருபவர் ரோஜா. இதனையடுத்து தேர்தலில் வெற்றிபெற்றபோது ரோஜாவுக்கு அமைச்சர் பதவி வழங்கப்படும் என பெரிதும் எதிர்பார்க்கப்பட்டது.

ஆனால் ஜெகன்மோகன் ரெட்டி அமைத்த புதிய அமைச்சரவையில் ரோஜாவுக்கு வாய்ப்பு அளிக்கப்படவில்லை. இது ஆந்திர ஊடகங்களில் பெரும் விவாதத்தை ஏற்படுத்தியது. இருந்தாலும் புதிய அமைச்சர்களுக்கு வாழ்த்துக்களை தெரிவித்தார் ரோஜா. இந்நிலையில் ஆந்திரப் பிரதேச தொழிற்துறை உள்கட்டமைப்புக் கழகத்தின் தலைவராக ரோஜா நியமனம் செய்யப்பட்டுள்ளதாக சில தினங்களுக்கு முன்னர் அறிவிப்பு வெளியானது.

மாநிலத்தின் தொழிற்துறை உள்கட்டமைப்பு கழகத்தின் தலைவர் பதவி மாநிலத்தின் மிக முக்கிய நியமன பதவிகளில் ஒன்றாகும். தொழிற்துறை மற்றும் உள்கட்டமைப்பு தொடர்பாக நிலம் ஒதுக்குவதற்கான அனைத்து அதிகாரங்களும் இவருக்கே உள்ளது. புதிய தொழில் நிறுவனங்களை ஏற்பது, நிராகரிப்பது என அனைத்து அதிகாரங்கள் இந்தக் கழகத்தின் தலைவருக்கு உண்டு. இந்த அறிவிப்பு சில தினங்களுக்கு முன்னர் வெளியானாலும் தற்போது தான் ரோஜா அந்த பதவியை ஏற்றுக்கொண்டுள்ளார்.