வணிகம்
ஜிஎஸ்டி 2.0 வரி குறைப்புகள்: வீட்டிலிருந்தபடியே எந்தப் பொருட்களில் எவ்வளவு சேமிக்கலாம் என்பதை அறியலாம்!
மத்திய அரசு பொதுமக்களுக்கு நிம்மதி அளிக்கும் வகையில் ஜிஎஸ்டி (GST) வரி அமைப்பில் பெரிய மாற்றங்களை மேற்கொண்டுள்ளது. இதன் ஒரு பகுதியாக “ஜிஎஸ்டி 2.0” எனப்படும் புதிய சீர்திருத்தம் அறிமுகப்படுத்தப்பட்டுள்ளது. இதன்மூலம் பல அத்தியாவசிய பொருட்களின் வரி விகிதங்கள் குறைக்கப்பட்டுள்ளன.
இந்த மாற்றங்களின் பயனை மக்கள் எளிதாக அறிந்து கொள்ள ‘savingwithgst.in’ என்ற புதிய இணையதளம் MyGov தளத்தின் மூலம் அறிமுகப்படுத்தப்பட்டுள்ளது. வரும் செப்டம்பர் 22, 2025 முதல் புதிய ஜிஎஸ்டி விகிதங்கள் அமலுக்கு வரும். நுகர்வோர் இந்த இணையதளத்தில் தங்கள் விருப்பப் பொருட்களை “கார்ட்டில்” சேர்த்து, வரி குறைவுக்கு முன் மற்றும் பின் விலைகளை ஒப்பிட்டு எவ்வளவு சேமிக்க முடிகிறது என்பதை காணலாம்.
உதாரணமாக, ஒரு லிட்டர் பால் வாங்கினால், பழைய VAT உடன் விலை ரூ.63.6 ஆக இருந்தது. ஆனால் புதிய GST 2.0 சீர்திருத்தத்திற்குப் பின் விலை ரூ.60 ஆகும். இதன்மூலம் நேரடியாக சேமிப்பு எவ்வளவு என்பதை அறியலாம்.
முக்கிய வரி மாற்றங்கள்:
அத்தியாவசிய உணவு பொருட்கள்: UHT பால், பனீர், இந்திய பிரட் வகைகள் ஆகியவற்றுக்கு பூஜ்ஜிய வரி.
வீட்டு உபயோகப் பொருட்கள்: சோப்பு, ஷாம்பு, டூத் பேஸ்ட், டூத் பிரஷ், டேபிள்வேர், சைக்கிள் போன்றவற்றுக்கு 5% GST.
சேவைகள்: சிறிய வாகனங்கள், கல்வி மற்றும் சுகாதார சேவைகளுக்கு வரி குறைப்பு.
ஜிஎஸ்டி புதிய பிரிவுகள்:
5% வரி பிரிவு
18% வரி பிரிவு
(சில பொருட்களுக்கு பூஜ்ஜிய வரி மற்றும் சில குறிப்பிட்ட பொருட்களுக்கு 40% வரை வரி தொடரும்).
இந்த ஜிஎஸ்டி 2.0 சீர்திருத்தங்கள், வருகிற தீபாவளிக்கு முன்னதாகவே நடைமுறைக்கு வருவதால், பொதுமக்களுக்கு பெரும் நிவாரணமாக இருக்கும் என எதிர்பார்க்கப்படுகிறது.
