வணிகம்
2026 இறுதிக்குள் தங்கம் ரூ.2 லட்சம் எட்டுமா? UBS புதிய கணிப்பு – முதலீட்டாளர்களுக்கு முக்கிய எச்சரிக்கை!
பணவீக்கம் மற்றும் பொருளாதார மந்தநிலைக்கு எதிரான பாதுகாப்பான முதலீடாக தங்கம் மீண்டும் முக்கியத்துவம் பெறத் தொடங்கியுள்ளது. 2026 ஆம் ஆண்டின் தொடக்கத்தில் தங்கம் மற்றும் வெள்ளி விலைகள் வரலாறு காணாத அளவுக்கு உயர்ந்தது. ஆனால், அமெரிக்கா–இஸ்ரேல் தாக்குதல் மற்றும் ஈரான் தொடர்பான பதற்றங்கள் ஏற்பட்டபோதும், எதிர்பார்த்ததைப் போல தங்கம் விலை அதிகரிக்காமல், தாறுமாறாக சரிவையும் சந்தித்தது.
தற்போது தங்கம் மற்றும் வெள்ளி விலைகள் ஏற்ற இறக்கத்துடன் நிலையாக நகர்கின்றன. இந்த நிலையில், முன்னணி பன்னாட்டு முதலீட்டு வங்கியான UBS, தங்கத்தின் குறுகிய கால முன்னேற்றம் குறித்து எச்சரிக்கையாக அணுகுகிறது.
இங்கிலாந்தைச் சேர்ந்த ExchangeRates வெளியிட்ட அறிக்கையின் படி, வலுவான அமெரிக்க டாலர், உயர்ந்த எண்ணெய் விலைகள் மற்றும் வட்டி விகித மாற்றங்கள் ஆகியவை தங்கத்தின் கவர்ச்சியை குறைத்துள்ளன. இதனால் தங்கம் போன்ற வருமானம் தராத சொத்துகளில் முதலீடு குறைந்துள்ளது.
இதன் விளைவாக, UBS தனது குறுகிய கால தங்க விலை கணிப்பை குறைத்துள்ளது. முன்பு ஜூன் மாத இறுதிக்குள் ரூ.5200 என கணிக்கப்பட்ட விலை, தற்போது அதைவிட குறைவாக இருக்கும் என மதிப்பிடப்பட்டுள்ளது. இதற்கு முக்கிய காரணம் முதலீட்டாளர் தேவையில் ஏற்பட்ட சரிவு மற்றும் சந்தை நிலை மாற்றங்களாகும்.
ஆனால், நீண்டகாலத்தில் தங்கத்தின் எதிர்காலம் இன்னும் வலுவாகவே உள்ளது என UBS தெரிவித்துள்ளது. மத்திய வங்கிகளின் அதிகரிக்கும் தேவை மற்றும் வளர்ந்து வரும் நாடுகளில் தங்கம் ஒரு முக்கிய கையிருப்பு சொத்தாக இருப்பது இதற்கு ஆதாரமாகும்.
மேலும், 2026 ஆம் ஆண்டின் இறுதிக்குள் தங்கத்தின் விலை ஒரு அவுன்ஸ் ரூ.5900 வரை உயரக்கூடும் என UBS கணித்துள்ளது. பணவீக்கம், புவிசார் அரசியல் பதற்றம் மற்றும் குறையும் உண்மையான வருவாய் ஆகியவை இந்த உயர்வுக்கு காரணமாக இருக்கும்.
இந்தியாவில், தீபாவளி போன்ற பண்டிகை காலங்களில் தங்க வாங்குதல் அதிகரிக்கும். அப்போது ஒரு அவுன்ஸ் தங்கம் $5900 என்ற நிலையை எட்டினால், இந்தியாவில் ஒரு பவுன் தங்கத்தின் விலை சுமார் ரூ.2 லட்சம் வரை உயரக்கூடும் என மதிப்பிடப்படுகிறது.
குறுகிய காலத்தில் தங்கம் விலை சற்று அழுத்தத்துடன் இருந்தாலும், நீண்டகாலத்தில் அது மீண்டும் உயர்வை காணும் வாய்ப்பு அதிகம் உள்ளது. எனவே, முதலீட்டாளர்கள் தங்கத்தை ஒரு பாதுகாப்பான மற்றும் நீண்டகால முதலீடாக கருதலாம்.
