டிசம்பர் மாத ஹனிமூன் ஸ்பெஷல்: புதுமண ஜோடிகள் இந்தியாவுக்குள் கட்டாயம் செல்ல வேண்டிய சிறந்த 7 இடங்கள்!

டிசம்பர் மாதம் சுற்றுலாவிற்கு மிகவும் ஏற்ற காலமாகக் கருதப்படுகிறது. குளிர்ச்சியான வானிலை, விடுமுறை காலம் மற்றும் இயற்கையின் அழகு ஆகியவை இந்த மாதத்தை ஹனிமூன் பயணத்திற்கு சிறந்ததாக மாற்றுகின்றன. பொதுவாக சுற்றுலாப் பயணிகள் அதிகமாக வந்தாலும், புதுமண தம்பதிகள் அமைதியாகவும், தனிப்பட்ட முறையிலும் நேரத்தை செலவிட ஏற்ற பல இடங்கள் இந்தியாவில் உள்ளன.

அந்த வகையில், டிசம்பர் மாதத்தில் ஹனிமூன் செல்ல புதுமண ஜோடிகளுக்கு சிறந்த 7 இந்திய சுற்றுலா தலங்கள் குறித்து இங்கு பார்க்கலாம்.

🏔️ நைனிதால்

உத்தரகாண்ட் மாநிலத்தில் அமைந்துள்ள நைனிதால், பசுமை சூழ்ந்த மலைகளும், அழகிய நைனி ஏரியும் கொண்ட ரம்மியமான மலைப் பிரதேசமாகும். டிசம்பரில் நிலவும் குளிர்ந்த வானிலையும், பனிமூடிய காலை நேரங்களும் உங்கள் ஹனிமூனை கனவுக்காட்சியாக மாற்றும். ஏரியில் படகுச் சவாரி, ஸ்னோ வியூ பாயிண்ட் போன்ற இடங்களை ஜோடிகள் ரசிக்கலாம். அழகிய காபி ஷாப்புகளும், வசதியான ஹோட்டல்களும் இங்கு நிறைந்துள்ளன.

❄️ குல்மர்க்

ஜம்மு & காஷ்மீரில் உள்ள குல்மர்க், ஹனிமூன் ஜோடிகளுக்கான சொர்க்கபூமி எனலாம். பனியால் மூடப்பட்ட மலைகள், பைன் மரங்கள் நிறைந்த காடுகள் கண்களை கொள்ளை அடிக்கும். சாகசங்களை விரும்பும் ஜோடிகளுக்கு ஸ்கீயிங், ஸ்னோபோர்டிங் போன்ற விளையாட்டுகள் சிறந்த அனுபவத்தை தரும்.

🏔️ மணாலி

இமாச்சல பிரதேசத்தின் புகழ்பெற்ற மலை நகரமான மணாலி, டிசம்பர் ஹனிமூனுக்கு மிகச் சிறந்த தேர்வு. பனிச்சறுக்கு, மலையேற்றம், ரோப் வே பயணம் போன்ற சாகச அனுபவங்களுடன், அமைதியான இயற்கை சூழலில் காதலான தருணங்களை கழிக்க முடியும்.

🌲 கொடைக்கானல்

தமிழ்நாட்டிலேயே ஹனிமூன் செல்ல விரும்பும் ஜோடிகளுக்கு கொடைக்கானல் மிகச் சிறந்த இடம். டிசம்பரில் அதிகமான குளிரும், மெல்லிய பனியும் கொடைக்கானலை ரொமான்டிக்காக மாற்றும். ஏரிகள், பூங்காக்கள், வியூ பாயிண்ட்கள் என பல இடங்களில் இயற்கையுடன் நேரம் கழிக்கலாம்.

🌿 கூர்க்

கர்நாடகாவின் கூர்க், “இந்தியாவின் ஸ்காட்லாந்து” என அழைக்கப்படும் அழகிய மலைப்பகுதி. காபி தோட்டங்கள், அருவிகள், பசுமையான மலைகள் ஹனிமூன் ஜோடிகளுக்கு சிறந்த அனுபவத்தை தரும். மலையேற்றம், இயற்கை நடைபயணம் போன்ற செயல்களும் இங்கு பிரபலமானவை.

🚤 ஆழப்புழா

‘விண்ணைத் தாண்டி வருவாயா’ திரைப்பட ரசிகர்களுக்கு கனவு ஹனிமூன் இடமாக விளங்குவது கேரளாவின் ஆழப்புழா. அமைதியான பின்நீரோடைகள், ஹவுஸ்போட் தங்குமிடம், சுவையான கேரள உணவுகள் ஆகியவை புதுமண ஜோடிகளுக்கு மறக்க முடியாத அனுபவத்தை வழங்கும்.

🌊 அந்தமான் & நிக்கோபார் தீவுகள்

மலைகளை விட கடற்கரை ஹனிமூனை விரும்பும் ஜோடிகளுக்கு அந்தமான் & நிக்கோபார் தீவுகள் சிறந்த தேர்வு. தெளிவான கடல் நீர், அழகிய சூரிய அஸ்தமனம், ஸ்கூபா டைவிங், ஸ்னோர்கலிங் போன்ற கடல் சாகசங்கள் ஹனிமூனை சிறப்பாக்கும். அமைதியான தனிமையும், ரொமான்டிக் சூழலும் இங்கு கிடைக்கும்.