வணிகம்
14 ஆயிரம் ஊழியர்களை பணிநீக்கம் செய்கிறோமா? பதறியடித்து அறிக்கை வெளியிட்ட அமேசான்?
அமேசான் நிறுவனம் 14,000 ஊழியர்களை பணிநீக்கம் செய்ய திட்டமிட்டுள்ளதாக சமீபத்தில் வெளியான தகவல்கள் பெரும் பரபரப்பை ஏற்படுத்தின. குறிப்பாக 2026 மே மாதத்திற்குள் உலகம் முழுவதும் இந்த பணிநீக்கம் நடைபெறும் என்றும், AWS, ரிட்டெயில் மற்றும் மனிதவள பிரிவுகளில் உள்ள மிட்-லெவல் மற்றும் வைட்-காலர் பணியாளர்கள் அதிகம் பாதிக்கப்படலாம் என்றும் கூறப்பட்டது. இந்த தகவல்கள் சமூக வலைத்தளங்கள் மற்றும் தொழில்முறை தளங்களில் வேகமாக பரவி, அமேசான் பணியாளர்களிடையே அச்சத்தையும் பதற்றத்தையும் உருவாக்கின.
ஆனால், இந்த செய்திகளை அமேசான் நிறுவனம் தெளிவாக மறுத்துள்ளது. “இந்த தகவல்கள் உண்மையல்ல, ஆதாரமற்றவை” என்று நிறுவனம் அதிகாரப்பூர்வமாக விளக்கம் அளித்துள்ளது. இதன் மூலம் தற்போது பரவி வரும் 14,000 பணிநீக்கம் குறித்த தகவல்கள் வெறும் வதந்தி மட்டுமே என்பதும் உறுதியாகிறது. இருந்தாலும், கடந்த சில மாதங்களில் அமேசான் மேற்கொண்ட பெரிய அளவிலான பணிநீக்கங்கள் காரணமாக இந்த புதிய வதந்தி பணியாளர்களிடையே நம்பிக்கையை இழக்கச் செய்துள்ளது.
குறிப்பாக, 2025 இறுதியில் மற்றும் 2026 ஜனவரியில் ஆயிரக்கணக்கான பணியாளர்கள் பணிநீக்கம் செய்யப்பட்டிருந்தனர். இதேபோல் Oracle, Microsoft, TCS, Accenture போன்ற பல பெரிய நிறுவனங்களும் சமீபத்தில் பணியாளர்களை குறைத்துள்ளன. இதனால் தொழில்நுட்ப துறையில் வேலை பாதுகாப்பு குறித்த கவலை அதிகரித்து வருகிறது.
மேலும், அமேசான் போன்ற நிறுவனங்கள் செயற்கை நுண்ணறிவு (AI) மற்றும் தானியக்க தொழில்நுட்பங்களில் அதிக முதலீடு செய்து வருவது workforce அமைப்பில் மாற்றங்களை ஏற்படுத்தும் என எதிர்பார்க்கப்படுகிறது. இதனால் எதிர்காலத்தில் சில வேலைகள் குறைய வாய்ப்பு இருப்பதாகவும் நிபுணர்கள் கருதுகின்றனர். மொத்தத்தில், தற்போது 14,000 பணிநீக்கம் பற்றிய தகவல் உண்மையல்ல என்றாலும், தொழில்நுட்ப துறையில் நடைபெறும் மாற்றங்கள் காரணமாக பணியாளர்களின் அச்சம் தொடர்கிறது.
