புதுச்சேரியில் முதியோர் உதவித்தொகை உயர்வு: மாதம் ரூ.500 அதிகரிப்பு, அடுத்த மாதம் முதல் அமல்!

இந்தியாவில் முதியோர் எண்ணிக்கை தொடர்ந்து அதிகரித்து வரும் நிலையில், பல முதியவர்கள் சுகாதாரம், தங்குமிடம், சமூக பாதுகாப்பு போன்ற அடிப்படை சிக்கல்களை எதிர்கொண்டு வருகின்றனர். வறுமை, பட்டினி, சமூக புறக்கணிப்பு போன்ற பிரச்சனைகளால் பாதிக்கப்படுவதுடன், பெரும்பாலான முதியவர்கள் தனிமையில் வாழ்ந்து வருவதாக புள்ளிவிவரங்கள் தெரிவிக்கின்றன. இவர்களின் வாழ்வாதாரத்தை பாதுகாக்க மத்திய மற்றும் மாநில அரசுகள் பல்வேறு சமூக பாதுகாப்புத் திட்டங்களை செயல்படுத்தி வருகின்றன. இதில் ஓய்வூதியம் முக்கியமான ஆதாரமாக உள்ளது.

அந்த வகையில், புதுச்சேரி மகளிர் மற்றும் குழந்தைகள் மேம்பாட்டுத் துறை சார்பில் முதியோர், விதவைகள் மற்றும் முதிர்கன்னிகளுக்கு மாதாந்திர உதவித்தொகை வழங்கப்பட்டு வருகிறது. தற்போது நடைமுறையில்,
55–59 வயதுடைய முதியவர்களுக்கு ரூ.2,000,
60–79 வயதுடைய முதியவர்களுக்கு ரூ.2,500,
80 வயதுக்கு மேற்பட்ட மூத்த குடிமக்களுக்கு ரூ.3,500 வழங்கப்பட்டு வருகிறது.

இந்நிலையில், கடந்த பட்ஜெட் கூட்டத்தொடரில் முதியோருக்கான உதவித்தொகையை மாதம் ரூ.500 உயர்த்தி வழங்கப்படும் என முதலமைச்சர் ரங்கசாமி அறிவித்திருந்தார். அதன்படி, தற்போது உதவித்தொகை உயர்வுக்கான அரசாணை வெளியிடப்பட்டுள்ளது. உயர்த்தப்பட்ட தொகை அடுத்த மாதம் முதல் பயனாளிகளுக்கு வழங்கப்பட உள்ளது.

இதுபோலவே, விதவை மகளின் திருமணத்திற்காக வழங்கப்பட்டு வந்த நிதி உதவி ரூ.30,000-இலிருந்து ரூ.40,000 ஆக உயர்த்தப்படும் என சட்டமன்றத்தில் அறிவிக்கப்பட்டிருந்தது. இதற்கான அரசாணையும் தற்போது வெளியிடப்பட்டுள்ளதால், இந்த உதவி தொகையும் விரைவில் நடைமுறைக்கு வர உள்ளது.