8வது ஊதியக்குழு பரிந்துரை: ஓய்வூதியதாரர்களுக்கு கம்யூடட் பென்ஷனில் முக்கிய மாற்றம் – நிதி நிம்மதி கிடைக்கும் வாய்ப்பு!

8வது ஊதியக்குழு மூலம் ஓய்வூதியதாரர்களுக்கு நம்பிக்கையூட்டும் நல்ல செய்தி வெளியாக இருக்கிறது. முக்கியமாக, கம்யூடட் பென்ஷனின் (Commuted Pension) மீட்பு காலம் தற்போதைய 15 ஆண்டுகளில் இருந்து 12 ஆண்டுகளாக குறைக்கப்படலாம் என எதிர்பார்க்கப்படுகிறது.

ஓய்வுபெறும் அரசுத்துறை ஊழியர்கள் பெரும்பாலும் தங்கள் ஓய்வூதியத்தில் ஒரு பகுதியை முன்கூட்டியே பெற விரும்புகிறார்கள். இதனை கம்யூடட் பென்ஷன் என அழைக்கின்றோம். தற்போது, அவர்கள் பெற்ற அந்த தொகைக்கு பதிலாக, மாத ஓய்வூதியத்தில் இருந்து ஒரு பகுதி 15 ஆண்டுகள் வரை கழிக்கப்படுகிறது.

இப்போது, 8வது ஊதியக்குழுவின் பரிந்துரையில், இந்த கழிப்பு காலத்தை 12 ஆண்டுகளாக குறைக்க சாத்தியக்கூறு அதிகமாக இருக்கிறது. இதன் மூலம், ஓய்வுபெற்றவர்கள் வேகமாக முழு ஓய்வூதியத்தை மீண்டும் பெறத் தொடங்குவர்.

ஊழியர் சங்கங்கள் இந்த மாற்றத்தை வலியுறுத்தி வந்த நிலையில், இந்த பரிந்துரை நாட்டின் லட்சக்கணக்கான ஓய்வூதியதாரர்களுக்கு நிதி நிவாரணம் அளிக்கும். குறிப்பாக, மருத்துவ செலவுகள் மற்றும் அன்றாட வாழ்க்கை செலவுகளுக்கு முழுமையான ஓய்வூதியத்தை நம்பிக்கையாக எதிர்நோக்கும் முதியவர்கள் பெரிதும் பயனடைவார்கள்.

இந்த மாற்றம் பழைய ஓய்வூதியதாரர்களுக்கும் பொருந்துமா? என்ற கேள்வி எழுந்துள்ளது. இது பின்னோக்கிச் செயல்படுத்தப்பட வேண்டுமென்று ஊழியர் அமைப்புகள் வலியுறுத்தி வருகின்றன. இது நடைமுறைக்கு வந்தால், நாடுமுழுவதும் ஓய்வூதியதாரர்களின் நிதி நிலையை உறுதியான முறையில் உயர்த்தும்.