பேடிஎம் பேமென்ட்ஸ் வங்கி உரிமம் ரத்து: ஆர்பிஐ அதிரடி – வாடிக்கையாளர்கள் கவலை!

இந்திய ரிசர்வ் வங்கி (Reserve Bank of India) Paytm Payments Bank மீது கடுமையான நடவடிக்கை எடுத்து, அதன் வங்கி உரிமத்தை ரத்து செய்துள்ளது. இந்த முடிவு திடீரென எடுக்கப்பட்டதாக அல்ல; கடந்த இரண்டு ஆண்டுகளாகவே அந்த வங்கி பல்வேறு கட்டுப்பாடுகளையும் கண்காணிப்புகளையும் சந்தித்து வந்தது.

ஆர்பிஐ வெளியிட்ட தகவலின்படி, பேடிஎம் பேமென்ட்ஸ் வங்கியின் செயல்பாடுகள் வாடிக்கையாளர்களின் நலனுக்கு எதிராக இருந்ததாகவும், வங்கியின் மேலாண்மை மற்றும் நிர்வாக முறைகள் திருப்திகரமாக இல்லாததாகவும் குறிப்பிடப்பட்டுள்ளது. மேலும், வங்கி ஒழுங்குமுறைச் சட்ட விதிகளை தொடர்ந்து மீறியதாகவும் கூறப்பட்டுள்ளது.

இதனால், இந்த வங்கியை தொடர்ந்து செயல்பட அனுமதிப்பது பொதுமக்களுக்கு எந்த நன்மையும் அளிக்காது என ஆர்பிஐ தீர்மானித்துள்ளது. அதன்படி, உரிமம் ரத்து செய்யப்பட்டதோடு, வங்கியை கலைப்பதற்கான நடவடிக்கைகளை உயர் நீதிமன்றத்தில் தொடங்க உள்ளதாகவும் அறிவிக்கப்பட்டுள்ளது.

இந்நடவடிக்கைக்கு முன்பே, 2022 மார்ச் மாதம் முதல் புதிய வாடிக்கையாளர்களை சேர்க்க பேடிஎம் வங்கிக்கு தடை விதிக்கப்பட்டிருந்தது. தொடர்ந்து, 2024 ஜனவரி மற்றும் பிப்ரவரி மாதங்களில் வாடிக்கையாளர் கணக்குகளில் புதிய டெபாசிட்கள், வாலெட் டாப்பப் மற்றும் கிரெடிட் பரிவர்த்தனைகளுக்கும் கட்டுப்பாடுகள் விதிக்கப்பட்டன. இந்த கட்டுப்பாடுகள் வங்கியின் செயல்பாட்டை ஏற்கனவே பாதித்திருந்த நிலையில், தற்போது முழுமையான உரிமம் ரத்து செய்யப்பட்டுள்ளது.

ஆனால், வாடிக்கையாளர்களுக்கு ஓரளவு நிம்மதி அளிக்கும் வகையில், அவர்களின் பணத்தை திருப்பிச் செலுத்துவதற்கு தேவையான போதிய நிதி (liquidity) வங்கியிடம் இருப்பதாக தெரிவிக்கப்பட்டுள்ளது. கலைப்பு செயல்முறையின் போது, வாடிக்கையாளர்கள் தங்களின் பணத்தை பாதுகாப்பாக மீண்டும் பெற முடியும் என்றும் கூறப்பட்டுள்ளது.

மேலும், Paytm செயலி வழியாக, யுபிஐ (UPI) சேவைகளை பயன்படுத்தி பிற வங்கி கணக்குகளை இணைத்து பண பரிவர்த்தனைகளை மேற்கொள்ளும் வசதி தொடர்ந்து கிடைக்கும் என்றும் ஆர்பிஐ தெளிவுபடுத்தியுள்ளது.