தமிழ்நாடு
70 லட்சம் வாக்குகள் வித்தியாசம்: தலை சுற்ற வைக்கும் அமைச்சர் ராஜேந்திர பாலாஜி!
அமைச்சர் ராஜேந்திர பாலாஜி அதிமுகவில் சர்ச்சைக்குறிய வகையில் பேசுவதில் வல்லவர். இவர் சமீபத்தில் பேசிய ஒன்று சலசலப்பையும், வியப்பையும் ஏற்படுத்தியுள்ளது. இடைத்தேர்தலில் அதிமுக வேட்பாளர் 70 லட்சம் வாக்குகள் வித்தியாசத்தில் வெற்றி பெறுவார் என அவர் பேசியுள்ளது குறிப்பிடத்தக்கது.
திருப்பரங்குன்றம், அரவக்குறிச்சி, ஓட்டப்பிடாரம் மற்றும் சூலூர் ஆகிய சட்டசபை தொகுதிகளுக்கு வரும் மே 19-ஆம் தேதி இடைத்தேர்தல் நடைபெற உள்ளது. இதில் ஒட்டப்பிடாரம் தொகுதியில் போட்டியிடும் அதிமுக வேட்பாளர் மோகனின் தேர்தல் அலுவலகம் திறப்பு விழாவில் அமைச்சர்கள் காமராஜ் மற்றும் ராஜேந்திரபாலாஜி ஆகியோர் கலந்துகொண்டனர்.
இதனையடுத்து செய்தியாளர்களை சந்தித்த அமைச்சர் ராஜேந்திர பாலாஜி, ஒட்டபிடாரம் தொகுதி அதிமுகவின் கோட்டையாக உள்ளது, இங்கு வலுவான கூட்டணி அமைத்துள்ளது அதிமுக. பலமான கூட்டணி சார்பாக போட்டியிடும் அதிமுக வேட்பாளர் மோகன் இங்கு 70 லட்சத்துக்கும் அதிகமான வாக்குகள் வித்தியாசத்தில் வெற்றி பெறக்கூடிய வாய்ப்புகள் பிரகாசமாக இருக்கிறது என்றார்.
ராஜேந்திர பாலாஜியின் இந்த பேச்சு தலை சுற்றும் அளவுக்கு உள்ளது. காரணம் ஓட்டப்பிடாரம் தொகுதியின் மொத்த வாக்காளர்களே 2 லட்சத்து 27 ஆயிரமாக உள்ள நிலையில், அதிமுக வேட்பாளர் 70 லட்சம் வாக்குகள் வித்தியாசத்தில் வெல்வார் என அமைச்சர் ராஜேந்திர பாலாஜி கூறியிருப்பது சலசலப்பை ஏற்படுத்தியுள்ளது.