வெற்றிமாறனின் உதவி இயக்குனராக சேர்ந்த முன்னாள் எம்.எல்.ஏ!

பிரபல இயக்குனர் வெற்றிமாறன் இடம் தமிழக முன்னாள் எம்எல்ஏ ஒருவர் உதவி இயக்குனராக சேர்ந்து உள்ளதாக தகவல் வெளியாகி உள்ளது.

வெற்றிமாறன் தற்போது சூரி நடித்து வரும் விடுதலை என்ற படத்தை இயக்கி வருகிறார் என்பதும் இந்த படத்தை முடித்துவிட்டு சூர்யா நடிக்க இருக்கும் வாடிவாசல் என்ற திரைப்படத்தை இயக்க உள்ளார் என்பதும் குறிப்பிடத்தக்கது

இந்த நிலையில் வாடிவாசல் படத்துக்கு வெற்றிமாறனின் உதவி இயக்குனராக நடிகரும் எம்எல்ஏவுமான கருணாஸ் இணைந்துள்ளதாக தகவல்கள் வெளியாகி உள்ளது

பாலா இயக்கிய நந்தா என்ற திரைப்படத்தின் மூலம் திரையுலகில் அறிமுகமானவர் கருணாஸ். அதன்பிறகு திண்டுக்கல் சாரதி மூலம் கதாநாயகனாக உருவெடுத்தார் என்பதும் அதன் பிறகும் அவர் திரையுலகில் பல திரைப்படங்களில் என்பது குறிப்பிடத்தக்கது

இந்த நிலையில் கடந்த 2016 ஆம் ஆண்டு ஆண்டு நடைபெற்ற தேர்தலில் திருவாடனை தொகுதியில் போட்டியிட்டு எம்எல்ஏவாக வெற்றி பெற்ற நிலையில் தற்போது அரசியலில் இருந்து விலகி மீண்டும் சினிமாவில் ஆர்வம் காட்டி வருகிறார். இந்த நிலையில் இயக்குனர் வெற்றி மாறனிடம் உதவி இயக்குனராக இணைந்துள்ளார். இதுகுறித்து அவர் கூறியதாவது:

‘கிராமிய கானா பாடகராக என் கலைவாழ்வைத் தொடங்கி இருந்தாலும் இவ்வளவு பெரிய அடையாளத்தையும் அறிமுகத்தையும் கொடுத்தது சினிமாதான். தாய் மடியான தமிழ் சினிமாவில் முழு நேரமும் பயணிக்க முடிவெடுத்து இருக்கிறேன்.

ஆற்றல்மிகு வெற்றிமாறனிடம் உதவி இயக்குநராக பணியாற்ற இருக்கிறேன். கடைசிவரை கற்றுக்கொள்வதுதான் சினிமாவின் சிறப்பு. இணைத்துக்கொண்ட வெற்றிக்கு என் நன்றி.

தற்போது பல்வேறு திரைப்படங்களில் நடித்துக்கொண்டிருந்தாலும் தமிழர் வீரத்தைப் பறைசாற்றும் இத்திரைப்படத்தில் உதவி இயக்குநராக பணியாற்றிவதில் பெருமை கொள்கிறேன். போலி வியாபரா அரசியலை புறந்தள்ளிவிட்டு எனது கலைத்தாய் வீட்டுக்கு திரும்பி இருக்கிறேன். எனக்குள் இருந்த உதவி இயக்குநர் கனவை வாடி வாசலே வாசல் திறந்துவிட்டிருக்கிறது’ என்று குறிப்பிட்டுள்ளார்.