*’இந்தியன்2′ வெளியீடு தள்ளிப் போகிறதா?

நடிகர் கமல்ஹாசன் நடிப்பில் உருவாகிக்கொண்டிருக்கும் இந்தியன் 2 திரைப்படம் அடுத்த வருடம் பொங்கலுக்கு வெளியாக வாய்ப்பிருப்பதாக தகவல் வெளியாகியுள்ளது.

இயக்குநர் ஷங்கர் இயக்கத்தில் நடிகர்கள் கமல்ஹாசன், ப்ரியா பவானி சங்கர், காஜல் அகர்வால், சித்தார்த், பாபி சிம்ஹா உள்ளிட்ட பலர் நடித்து வரக்கூடிய திரைப்படம் ‘இந்தியன் 2’. கடந்த கொரோனா காலகட்டத்திற்கு முன்னால் ஆரம்பித்து சில காரணங்களால் இந்த படம் பாதியில் நின்று போனது.

இப்பொழுது மீண்டும் இதன் படப்பிடிப்பு துவங்கி உள்ள நிலையில் பணிகள் அனைத்தும் முழுவீச்சில் நடந்து வருகிறது. இயக்குநர் ஷங்கர் தற்பொழுது ‘இந்தியன்2’ மற்றும் ராம்சரண் படம் என இரண்டையும் ஒரே சமயத்தில் படப்பிடிப்பு நடத்தி வருகிறார். ‘இந்தியன் 2’ படத்திற்கு 15 நாட்களும், ராம்சரண் படத்திற்கு 15 நாட்கள் என சங்கர் இரண்டு படப்பிடிப்பிலும் மாறி மாறி பங்கு கொண்டு வருகிறார்.

‘இந்தியன் 2’ போய்க் கொண்டிருக்கக் கூடிய ஷெட்யூல் முடிவதற்கு ஜூலை ஆகிவிடும் என்ற நிலையில் போஸ்ட் புரொடக்ஷன் பணிகள் இரண்டு படங்களுக்கும் ஒரே சமயத்தில் நடக்க இருக்கும்.

இதனால் ‘இந்தியன் 2’ படம் இந்த தீபாவளிக்கு வெளியிட படக்குழு திட்டமிட்டுள்ளது. அதற்குள் பணிகள் முடிவடையாவிட்டால் நிச்சயம் அடுத்த வருடம் பொங்கல் அன்று வெளியாக அதிக வாய்ப்பு இருக்கிறது என்கிறார்கள். லைகா நிறுவனம் தயாரிக்கும் இந்த படத்திற்கு அனிருத் இசையமைக்கிறார்.

சமீபத்தில் நடிகை காஜல் அகர்வால் குதிரை ஏற்ற பயிற்சி, வாள் பயிற்சி போன்றவற்றில் ஈடுபட்டு ‘இந்தியன் 2’ படத்திற்காக கிட்டத்தட்ட 3:30 மணி நேரம் ஒப்பனை செய்து இருப்பதாகவும் சமூக வலைதளங்களில் அப்டேட் கொடுத்தார் என்பது குறிப்பிடத்தக்கது.