உலக பங்குச்சந்தைகள் உயர்வு – முதலீட்டாளர்கள் தங்கத்தை விற்று பங்குகளில் முதலீடு செய்யத் தொடங்கினர்!

உலகளவில் முக்கிய பங்குச்சந்தைகள் வரலாற்று உச்சங்களை எட்டியுள்ளதால், முதலீட்டாளர்கள் அதிக லாபம் பெறும் நோக்கில் தங்கத்தை விற்று பங்குகளில் முதலீடு செய்யத் தொடங்கியுள்ளனர். இதன் விளைவாக, தங்கத்தின் விலை தொடர்ந்து சரிவைக் காண்கிறது.

கடந்த சில நாட்களாகக் குறைந்து வந்த தங்கத்தின் விலை, வெள்ளிக்கிழமை காலை சிறிதளவு உயர்ந்திருந்தாலும், மாலை நேரத்தில் மீண்டும் சரிந்தது. சென்னையில் இன்று ஒரு கிராம் ஆபரணத் தங்கம் ரூ.140 குறைந்து ₹11,400 ஆகவும், ஒரு சவரன் ரூ.1,120 குறைந்து ₹91,200 ஆகவும் விற்பனையாகிறது.

அதேபோல், வெள்ளி விலையும் தொடர்ச்சியாகக் குறைந்து வருகிறது. இன்று மாலை நிலவரப்படி, ஒரு கிராம் வெள்ளி ₹1 குறைந்து ₹170 ஆகவும், பார் வெள்ளி கிலோவுக்கு ₹3,000 குறைந்து ₹1,70,000 ஆகவும் விற்பனையாகிறது.

நிதி சந்தைகளில் ஏற்பட்ட பணத் தட்டுப்பாடு காரணமாக, முதலீட்டாளர்கள் தங்கத்தை விற்று பங்குகளில் பணத்தை மாற்றத் தொடங்கியுள்ளனர் என நிபுணர்கள் தெரிவிக்கின்றனர். மேலும், அமெரிக்க டாலர் மதிப்பு வலுவடைதலும், அமெரிக்காவின் மத்திய வங்கியான பெடரல் ரிசர்வ் வட்டி விகிதங்களை குறைக்கும் என்ற எதிர்பார்ப்பும் தங்க விலை குறைவுக்கு வழிவகுத்துள்ளதாகவும் அவர்கள் கூறுகின்றனர்.

தற்போதைய நிலைமையில், உலக பங்குச்சந்தைகளின் உயர்வும், தங்க விலையின் சரிவும் முதலீட்டு திசைமாற்றத்தை வெளிப்படுத்துகிறது என பொருளாதார நிபுணர்கள் கூறுகின்றனர்.