ஆப்பிள் செல்போன் விற்பனை, கூகுள் பே சேவை நிறுத்தம்: திணறும் ரஷ்யர்கள்!

ஆப்பிள் செல்போன் விற்பனை, கூகுள்பே பண பரிமாற்ற செயலி உள்பட பல்வேறு சேவைகள் ரஷ்யாவில் நிறுத்தப்பட்டுள்ளதால் ரஷ்யர்கள் திணறி வருவதாக தகவல்கள் வெளியாகியுள்ளன.

உக்ரைன் மீது ரஷ்யா கடந்த ஒரு வாரமாக தாக்குதல் நடத்தி வரும் நிலையில் உக்ரைன் நாடு பெரும் பாதிப்புக்கு உள்ளாகியுள்ளது. உக்ரைன் நாட்டின் பொதுமக்கள் மட்டுமின்றி அந்நாட்டில் வாழும் இந்தியர்கள் உள்பட வெளிநாட்டவர்களும் சிக்கலுக்கு உள்ளாகி உள்ளனர்.

இந்த நிலையில் உக்ரைன் நாட்டின் மீதான தாக்குதலை உடனடியாக நிறுத்தக் கோரி உலக நாடுகள் கோரிக்கை விடுத்தும் தொடர்ந்து ரஷ்யா தாக்குதல் நடத்தி வருவதால் ரஷ்யா மீது பல்வேறு தடைகள் பிறப்பிக்கப்பட்டுள்ளன.

ரஷ்யாவில் இருந்து இறக்குமதி செய்யப்படும் கச்சா எண்ணெய்யை கனடா நிறுத்திவிட்டது என்பதும், அமெரிக்கா உள்பட பல நாடுகள் ரஷ்யா மீது பொருளாதார தடை விதிக்கப்பட்டது என்பதும் தெரிந்ததே., அதுமட்டுமின்றி ரஷ்யாவுக்கு ஆப்பிள் செல்போன் உள்பட ஆப்பிள் உற்பத்தி பொருட்கள் அனைத்தும் விற்பனை செய்ய தற்காலிகமாக நிறுத்தப்பட்டதாக ஆப்பிள் நிறுவனம் தெரிவித்துள்ளது.

அதேபோல் கூகுள்பே உள்பட அனைத்து விதமான பணபரிமாற்ற செயலிகளின் சேவையும் ரஷ்யாவில் நிறுத்தப்படுவதாக அறிவிக்கப்பட்டுள்ளது. இதனால் மெட்ரோ ரயில் உள்பட பயணம் செய்யும் பயணிகள் பணப்பரிமாற்ற செயலிகளை பயன்படுத்த முடியாமல் கரன்சியை பயன்படுத்தும் நிலை ஏற்பட்டுள்ளது.

இதனால் நீண்ட வரிசையில் பொதுமக்கள் மெட்ரோ ரயில் டிக்கெட் எடுக்க காத்திருப்பதாக தகவல்கள் வெளியாகியுள்ளன. மொத்தத்தில் ரஷ்யாவை நிலைகுலைய வைக்க உலக நாடுகள் ஒன்று சேர்ந்து பல்வேறு தடைகளை விதித்து வந்தாலும் உக்ரைன் மீது தொடர்ச்சியாக ரஷ்யா தாக்குதல் நடத்தி வருகிறது என்பது குறிப்பிடத்தக்கது.