8வது ஊதியக்குழு அப்டேட்: குறைந்தபட்ச சம்பளம் உயருமா? Fitment Factor மற்றும் ஓய்வூதியம் குறித்து முக்கிய தகவல்கள்!

மத்திய அரசு ஊழியர்கள் மற்றும் ஓய்வூதியதாரர்கள் நீண்ட நாட்களாக எதிர்பார்த்து வந்த 8வது ஊதியக்குழு தொடர்பான முக்கிய அப்டேட்கள் வெளியாகி வருகின்றன. குறிப்பாக, சமீபத்தில் நடைபெற்ற தேசிய கூட்டு ஆலோசனைக் குழு (NC JCM) 49வது கூட்டம், 8வது ஊதியக்குழு அமலாக்கத்திற்கான முக்கிய முன்னேற்றமாக பார்க்கப்படுகிறது.

அமைச்சரவைச் செயலாளர் டி.வி. சோமநாதன் தலைமையில் டெல்லியில் நடைபெற்ற இந்த உயர்மட்டக் கூட்டத்தில், அரசு அதிகாரிகளும் ஊழியர் சங்க பிரதிநிதிகளும் பல்வேறு கோரிக்கைகள் குறித்து விரிவாக ஆலோசனை நடத்தினர்.

இந்த கூட்டத்தில் மத்திய அரசு ஊழியர்களின் சம்பள உயர்வு, பதவி உயர்வு, ஓய்வூதிய பலன்கள், படிகள் மற்றும் வேலை சூழல் உள்ளிட்ட முக்கிய அம்சங்கள் விவாதிக்கப்பட்டன. குறிப்பாக, குறைந்தபட்ச அடிப்படை ஊதியத்தை உயர்த்த வேண்டும் என்ற கோரிக்கை முக்கிய இடம் பெற்றது.

மேலும், Fitment Factor எனப்படும் தகுதி நிர்ணய காரணி உயர்த்தப்பட்டால் மட்டுமே ஊழியர்களின் நிகர சம்பளத்தில் பெரிய மாற்றம் ஏற்படும் என ஊழியர் சங்கங்கள் வலியுறுத்தின. இதனுடன், ஆண்டு ஊதிய உயர்வு முறையை மறுசீரமைத்தல் மற்றும் தகுதியான ஊழியர்களுக்கு காலதாமதமின்றி பதவி உயர்வு வழங்குதல் குறித்தும் கோரிக்கைகள் முன்வைக்கப்பட்டன.

புதிய ஓய்வூதியத் திட்டமான NPS மற்றும் ஒருங்கிணைந்த ஓய்வூதியத் திட்டம் (UPS) குறித்தும் கூட்டத்தில் தீவிரமாக விவாதிக்கப்பட்டது. பழைய ஓய்வூதியத் திட்டத்தின் பலன்களை மீண்டும் வழங்க வேண்டும் என்ற கோரிக்கையை ஊழியர் தரப்பு வலியுறுத்தியது.

இதற்கிடையில், மருத்துவ வசதிகள் மற்றும் கல்வி தொடர்பான பிரச்சினைகளும் கூட்டத்தில் பேசப்பட்டன. CGHS மற்றும் CS(MA) திட்டங்களின் கீழ் மருத்துவச் செலவுகளுக்கான முழுமையான ஈட்டுத்தொகை வழங்கப்பட வேண்டும் என்று கோரிக்கை வைக்கப்பட்டது. குறிப்பாக, செவித்திறன் கருவிகளுக்கான ஈட்டுத்தொகை கடந்த பல ஆண்டுகளாக மாற்றப்படவில்லை என்பதால் அதை உடனடியாக திருத்த வேண்டும் என்று வலியுறுத்தப்பட்டது.

மேலும், PM Shri Kendriya Vidyalaya பள்ளிகளில் கல்வி பயிலும் குழந்தைகளுக்கான கல்வி உதவித்தொகை மற்றும் புதிய CGHS மையங்கள் அமைப்பது குறித்தும் ஆலோசிக்கப்பட்டது.

வழக்கமாக 10 ஆண்டுகளுக்கு ஒருமுறை புதிய ஊதியக்குழு அமல்படுத்தப்படுவதால், 2026 ஜனவரி முதல் 8வது ஊதியக்குழு அமலுக்கு வரலாம் என்று எதிர்பார்க்கப்படுகிறது. இதன் மூலம் 1.2 கோடிக்கும் அதிகமான மத்திய அரசு ஊழியர்களும் ஓய்வூதியதாரர்களும் பயனடைவார்கள் என கூறப்படுகிறது.