கலைஞர் மகளிர் உரிமைத் தொகை திட்டத்தில் புதிய பயனாளிகள் – விரைவில் அறிவிப்பு!

தமிழ்நாடு அரசு செயல்படுத்தி வரும் கலைஞர் மகளிர் உரிமைத் தொகை திட்டம் தொடர்பாக பெண்களுக்கு விரைவில் நல்ல செய்தி வெளியாக உள்ளது.

காஞ்சிபுரத்தில் நடைபெற்ற திருமண விழாவில் கலந்து கொண்ட துணை முதலமைச்சர் உதயநிதி ஸ்டாலின், இதுவரை இந்த திட்டத்தின் மூலம் 1.20 கோடி பெண்கள் பயனடைந்துள்ளனர் என்று தெரிவித்துள்ளார். கடந்த இரண்டு ஆண்டுகளில், தகுதி பெற்ற பெண்களுக்கு மாதம் ரூ.1,000 என மொத்தம் ரூ.24,000 வழங்கப்பட்டுள்ளது என்றும் குறிப்பிட்டார்.

இந்த திட்டம் 2023 செப்டம்பர் 15 அன்று தொடங்கப்பட்டது. இப்போது அது தனது இரண்டாம் ஆண்டை நிறைவு செய்து, வரும் செப்டம்பர் 15 அன்று மூன்றாம் ஆண்டில் அடியெடுத்து வைக்கிறது.

மேலும், உங்களுடன் ஸ்டாலின் முகாமில் விண்ணப்பித்த பெண்களைப் பற்றியும் அவர் பேசியுள்ளார். தகுதியான பெண்கள் தேர்வு செய்யப்பட்டு, அவர்களும் விரைவில் இந்த திட்டத்தில் பயனாளிகளாக சேர்க்கப்படுவார்கள் என்று அவர் கூறினார்.

ஆனால், அனைவரும் சேர்க்கப்படுவார்கள் என்று அவர் தெளிவாக கூறவில்லை. தகுதியான பெண்கள் மட்டுமே தேர்ந்தெடுக்கப்பட்டு, அவர்களுக்கு மாதம் ரூ.1,000 வழங்கப்படும் என்று துணை முதலமைச்சர் குறிப்பிட்டார்.

இந்த புதிய பயனாளிகள் குறித்து அதிகாரப்பூர்வ அறிவிப்பு செப்டம்பர் 15 அல்லது அதற்கு பிறகு வெளியாகும் வாய்ப்பு உள்ளது. ஏற்கனவே விண்ணப்பங்கள் பரிசீலனையில் உள்ளன. படிப்படியாக தகுதியான பெண்கள் தேர்வு செய்யப்பட்டு, அவர்களுக்கு உரிமைத் தொகை வழங்கப்படும்.