சிந்துவெளி எழுத்து புதிரை விடுவிக்கும் ஆய்வாளர்களுக்கு 1 மில்லியன் டாலர் பரிசு – முதல்வர் மு.க. ஸ்டாலின் அறிவிப்பு!

சென்னை: தமிழ்நாடு அரசின் தொல்லியல் துறை சார்பில் சிந்துவெளி நாகரிக நூற்றாண்டு கருத்தரங்கு இன்று சென்னையில் தொடங்கப்பட்டது. இந்த நிகழ்ச்சியை முதல்வர் மு.க. ஸ்டாலின் தலைமை தாங்கி தொடங்கி வைத்தார்.

நிகழ்ச்சியில், சிந்துவெளிப் பண்பாட்டை உலகறியச் செய்த முன்னாள் இந்தியத் தொல்லியல் துறை தலைமை இயக்குநர் சர் ஜான் ஹீபர்ட் மார்ஷலின் திருவுருவச் சிலைக்கு முதலமைச்சர் மு.க. ஸ்டாலின் அடிக்கல் நாட்டினார்.

தொடர்ந்து நிகழ்ச்சியில் பேசிய மு.க. ஸ்டாலின், “சிந்துவெளி நாகரிகம் ஆரியத்துக்கு முன்பட்டது என்று ஜான் மார்ஷல் குறிப்பிட்டார். அண்ணா சிந்துவெளி அடையாளங்களை வெளிக்கொண்டு வந்தார். செம்மொழி மாநாட்டில் கருணாநிதி சிந்துவெளி நாகரிகத்தின் முக்கியத்துவத்தை உலகுக்கு எடுத்துரைத்தார்,” என தெரிவித்தார்.

மேலும், “சிந்துவெளி எழுத்து புதிரை திறமையாகப் புரிந்து விளக்குபவர்களுக்கு தமிழ்நாடு அரசு சார்பில் 1 மில்லியன் அமெரிக்க டாலர் பரிசு அளிக்கப்படும். இத்துடன், கல்வெட்டு ஆய்வாளர்களை ஊக்குவிக்கும் நோக்கில், ஆண்டுதோறும் இரண்டு முக்கிய அறிஞர்களுக்கு விருதுகள் வழங்கப்படும்,” என்றார்.

அதுமட்டுமல்லாமல், தொல்லியல் அறிஞர் ஐராவதம் மகாதேவனின் பெயரில் ஆய்வு இருக்கை உருவாக்க ரூ.2 கோடி நிதி ஒதுக்கப்படும் என்றும் அவர் அறிவித்தார்.

இந்த அறிவிப்புகள் தமிழ் கலாச்சார வரலாற்றைத் திறம்பட ஆராய்வதற்கும் உலக அளவில் இதன் மதிப்பை உயர்த்துவதற்கும் உதவியாக இருக்கும் என்று தெரிவித்தார்.