இரட்டை வேடத்தில் மிரட்டும் நயன்தாரா… ஐரா ட்ரெய்லர் ரிலீஸ்!

மாயா, டோரா, அறம், கோலமாவு கோகிலா வரிசையில் அடுத்ததாக லேடி சூப்பர்ஸ்டார் நயன்தாரா நாயகிக்கு முக்கியத்துவம் வாய்ந்த படமான ஐராவில் நடித்துள்ளார். மேலும், ஐரா படத்தில் நயன்தாரா முதன்முறையாக இரட்டை வேடத்தில் நடித்துள்ளார்.

கே.ஜே.ஆர் ஸ்டுடியோ தயாரிப்பில் கோத்தபாடி ராஜேஷ் மற்றும் ட்ரிடென்ட் ஆர்ட்ஸ் இணைந்து தயாரித்துள்ள படம் ஐரா. ‘லட்சுமி’, ‘மா’ ஆகிய குறும்படங்களை இயக்கிய சர்ஜுன் எச்சரிக்கை இது மனிதர்கள் நடமாடும் என்ற படத்தின் மூலம் வெள்ளித்திரையில் இயக்குநராக அறிமுகமானார்.

சத்யராஜ், வரலட்சுமி சரத்குமார் நடிப்பில் உருவான அந்த படம் தோல்வியை சந்தித்தது. இந்நிலையில், நயன்தாராவை வைத்து ஹாரர் ஜானரில் உருவாகியிருக்கும் இந்தப் படத்தில் யமுனா, பவானி என இரண்டு கதாபாத்திரங்களில் நயன் நடித்துள்ளார். மேலும் கலையரசன், யோகிபாபு, ஜெயபிரகாஷ், லீலாவதி உள்பட பலர் முக்கிய கதாபாத்திரங்களில் நடித்துள்ளனர்.

மார்ச் 28-ம் தேதி திரைக்கு வர இருக்கும் இந்தப் படத்தின் ட்ரெய்லரை படக்குழுவினர் வெளியிட்டுள்ளனர். ட்ரெய்லர் முழுக்க நயன்தாரா இடம்பெறும் காட்சிகளாகவே அமைந்துள்ளன. நயன்தாரா வித்தியாசமான கதாபாத்திரத்தில் நடித்திருப்பதால் படத்தின் மீதான எதிர்பார்ப்பு அதிகரித்துள்ளது.