டிஜிட்டலில் மீண்டும் வரும் ‘மூன்றாம் பிறை’.. அமேசான் பிரைமில் வெளியாகும் கமல் – ஸ்ரீதேவி கிளாசிக் படம்!

தமிழ் சினிமாவில் உணர்ச்சிப்பூர்வமான கிளாசிக் படங்களின் பட்டியலில் என்றும் தனி இடம் பிடித்திருக்கும் Moondram Pirai திரைப்படம், தற்போது டிஜிட்டல் முறையில் புதுப்பிக்கப்பட்ட வடிவில் ஓடிடி தளத்தில் வெளியாக உள்ளது.

இயக்குநர் Balu Mahendra இயக்கத்தில் 1982ஆம் ஆண்டு வெளியான இந்த படம், காலத்தால் அழியாத சினிமா படைப்பாக ரசிகர்களால் கொண்டாடப்பட்டு வருகிறது. உணர்வுகளை நுணுக்கமாக காட்சிப்படுத்தும் தனித்துவமான திரைப்பட பாணிக்காக அறியப்பட்ட பாலுமகேந்திரா, இந்த படத்திற்கு கதை, இயக்கம் மற்றும் ஒளிப்பதிவை கவனித்திருந்தார்.

Kamal Haasan மற்றும் Sridevi இணைந்து நடித்த இந்த திரைப்படம், அவர்களின் திரை வாழ்க்கையில் முக்கியமான படைப்பாக கருதப்படுகிறது. குறிப்பாக, கமல்ஹாசனின் நடிப்பு தேசிய அளவில் பாராட்டைப் பெற்று, அவருக்கு சிறந்த நடிகருக்கான தேசிய விருதையும் பெற்றுத் தந்தது.

இந்த படத்தில் இடம்பெற்ற “கண்ணே கலைமானே”, “பொன்மேனி உருகுதே”, “பூங்காற்று புதிதானது” போன்ற பாடல்கள் இன்று வரை இசை ரசிகர்களால் விரும்பிக் கேட்கப்படுகின்றன. இசையமைப்பாளர் Ilaiyaraaja உருவாக்கிய இந்த பாடல்கள், தமிழ் சினிமாவின் காலத்தால் அழியாத மெலடிகளாக பார்க்கப்படுகின்றன.

மேலும், ஒய்.ஜி. மகேந்திரன், சில்க் ஸ்மிதா, பூர்ணம் விஸ்வநாதன் மற்றும் காந்திமதி உள்ளிட்ட பலரும் முக்கிய கதாபாத்திரங்களில் நடித்திருந்தனர்.

வெளியான காலத்தில் விமர்சகர்களின் பாராட்டைப் பெற்ற இந்த படம், ஒரு ஆண்டுக்கும் மேலாக திரையரங்குகளில் வெற்றிகரமாக ஓடியது. சிறந்த ஒளிப்பதிவுக்கான தேசிய விருதை பாலுமகேந்திரா பெற்றதுடன், பல மாநில மற்றும் திரைப்பட விருதுகளையும் இந்த படம் வென்றது.

தற்போது டிஜிட்டல் முறையில் ரீஸ்டோர் செய்யப்பட்டுள்ள Moondram Pirai திரைப்படம், வரும் மே 1, 2026 முதல் Amazon Prime Video தளத்தில் வெளியாகிறது. இது பழைய ரசிகர்களுக்கும் புதிய தலைமுறையினருக்கும் இந்த அற்புதமான படைப்பை மீண்டும் அனுபவிக்கும் வாய்ப்பை வழங்குகிறது.