காந்தா திரைப்பட ரிலீஸ் தள்ளிவைப்பு: ரசிகர்களுக்கு ஏமாற்றம் – புதிய தேதி விரைவில்!

காந்தா திரைப்பட ரிலீஸ் தள்ளிவைப்பு: துல்கர் சல்மான் படத்தை எதிர்பார்த்த ரசிகர்களுக்கு ஏமாற்றம்!

துல்கர் சல்மான் நடிப்பில் உருவாகியுள்ள காந்தா திரைப்படம், முதலில் செப்டம்பர் 12 ஆம் தேதி வெளியாகும் என அறிவிக்கப்பட்டிருந்தது. ஆனால் தற்போது, படக்குழு அதிகாரப்பூர்வமாக வெளியிட்ட அறிவிப்பில், காந்தா படத்தின் ரிலீஸ் தற்காலிகமாக ஒத்திவைக்கப்பட்டுள்ளதாகத் தெரிவிக்கப்பட்டுள்ளது.

காந்தா – தயாரிப்பு பின்னணி
துல்கர் சல்மானின் வெய்ஃபரர் பிலிம்ஸ் மற்றும் ராணா டகுபதியின் ஸ்பிரிட் மீடியா இணைந்து தயாரிக்கும் இந்த பான்-இந்தியா படம், 1950களின் சென்னையை மையமாகக் கொண்டு உருவாக்கப்பட்டுள்ளது.
படத்தை தி ஹன்ட் ஃபார் வீரப்பன் என்ற நெட்ஃபிளிக்ஸ் ஆவணப்படத் தொடரை இயக்கிய செல்வமணி செல்வராஜ் இயக்கியுள்ளார்.

இப்படத்தில் துல்கர் சல்மான், சமுத்திரக்கனி, ராணா டகுபதி, பாக்யஸ்ரீ போர்ஸ் ஆகியோர் முக்கிய கதாபாத்திரங்களில் நடித்துள்ளனர். ஜானு சாண்டர் இசையமைத்துள்ளார், டேனி சான்செஸ் லோபஸ் ஒளிப்பதிவு செய்துள்ளார்.

ரிலீஸ் தள்ளிவைப்பின் காரணம்?
காந்தா படக்குழு வெளியிட்டுள்ள அறிக்கையில், “எங்களது முந்தைய லோகா திரைப்படம் ரசிகர்களின் பெரும் வரவேற்பைப் பெற்று வெற்றிகரமாக ஓடிக்கொண்டிருக்கிறது. அதனால் அந்த வெற்றி இன்னும் சில நாள்கள் நீடிக்க வேண்டும் என்று விரும்புகிறோம். அதே நேரத்தில் காந்தாவை சிறந்த திரையனுபவமாக வழங்க தீவிரமாக உழைக்கிறோம். எனவே காந்தா படத்தின் வெளியீடு தற்காலிகமாக ஒத்திவைக்கப்படுகிறது. புதிய ரிலீஸ் தேதியை விரைவில் அறிவிப்போம்” என்று தெரிவித்துள்ளனர்.