வணிகம்
2026-27 ITR தாக்கல் தொடக்கம்: ITR-1, ITR-4 படிவங்கள் செயல்பாட்டில்.. யாரெல்லாம் வருமான வரி தாக்கல் செய்யலாம்?
2026-27 மதிப்பீட்டு ஆண்டிற்கான (Assessment Year) வருமான வரி தாக்கல் செயல்முறையை வருமான வரித் துறை அதிகாரப்பூர்வமாக தொடங்கியுள்ளது. இதன் ஒரு பகுதியாக, ITR-1 மற்றும் ITR-4 படிவங்களுக்கான எக்செல் பயன்பாடுகள் (Excel Utilities) மற்றும் ஆன்லைன் தாக்கல் வசதிகள் தற்போது செயல்பாட்டுக்கு கொண்டு வரப்பட்டுள்ளன. இதனால், லட்சக்கணக்கான வரி செலுத்துவோர் தங்களது வருமான வரிக் கணக்கை முன்கூட்டியே தாக்கல் செய்யும் வாய்ப்பைப் பெற்றுள்ளனர்.
மே 15 முதல் இந்த வசதி கிடைக்கத் தொடங்கியுள்ளதாக வருமான வரித் துறை அறிவித்துள்ளது. குறிப்பாக சம்பளதாரர்கள், சிறு வணிகர்கள் மற்றும் சுயதொழில் செய்பவர்களுக்கு இந்த அறிவிப்பு மிக முக்கியமானதாக பார்க்கப்படுகிறது.
ITR-1 படிவம் ஆண்டு வருமானம் ரூ.50 லட்சம் வரை உள்ள தனிநபர்களுக்காக வடிவமைக்கப்பட்டுள்ளது. சம்பளம், ஓய்வூதியம், ஒரு வீட்டு சொத்து மற்றும் வட்டி போன்ற பிற ஆதாரங்கள் மூலம் வருமானம் பெறுபவர்கள் இந்த படிவத்தை பயன்படுத்தலாம்.
அதேபோல், ITR-4 படிவம் சிறு தொழில் மற்றும் வணிக வருமானம் பெறும் தனிநபர்கள், இந்து கூட்டுக் குடும்பங்கள் (HUF) மற்றும் LLP அல்லாத நிறுவனங்களுக்கு பொருந்தும். Presumptive Taxation Scheme-இன் கீழ் வரி தாக்கல் செய்பவர்கள் இந்த படிவத்தை பயன்படுத்த முடியும்.
வரி செலுத்துவோருக்கு தற்போது இரண்டு விதமான தாக்கல் வசதிகள் வழங்கப்பட்டுள்ளன. இணையதளத்தில் நேரடியாக தகவல்களை உள்ளிட்டு ஆன்லைனில் தாக்கல் செய்யலாம். அல்லது, இணைய இணைப்பு இல்லாமல் பணியாற்ற விரும்புபவர்கள் எக்செல் பயன்பாட்டை பதிவிறக்கம் செய்து, அதில் விவரங்களை பூர்த்தி செய்து பின்னர் இணையதளத்தில் பதிவேற்றம் செய்யலாம்.
இந்த நடவடிக்கை மூலம் கடைசி நேர அவசரங்கள் மற்றும் தொழில்நுட்ப சிக்கல்களைத் தவிர்க்க முடியும் என நிபுணர்கள் கூறுகின்றனர். குறிப்பாக ஜூலை 31 காலக்கெடுவிற்கு முன்பே தாக்கல் செய்வது ரீஃபண்ட் விரைவாக கிடைக்க உதவும். மேலும், தவறுகள் இருந்தால் திருத்துவதற்கும் போதுமான நேரம் கிடைக்கும்.
ITR என்றால் என்ன?
ITR (Income Tax Return) என்பது ஒரு நபர் தனது ஆண்டு வருமானம், வரி விலக்குகள், ஏற்கனவே செலுத்திய வரிகள் மற்றும் செலுத்த வேண்டிய வரி பொறுப்புகள் குறித்து வருமான வரித் துறைக்கு அளிக்கும் அதிகாரப்பூர்வ அறிக்கையாகும். வருமானத்தின் தன்மை மற்றும் வரி செலுத்துபவரின் பிரிவை பொறுத்து சரியான ITR படிவத்தை தேர்வு செய்ய வேண்டும்.
