மாற்றுத்திறனாளிகளுக்கு அரசு வீடுகளில் 4% இடஒதுக்கீடு: மத்திய அரசு முக்கிய அறிவிப்பு!

மாற்றுத்திறனாளிகளுக்கு மிகுந்த மகிழ்ச்சியளிக்கும் செய்தியாக, மத்திய அரசு முக்கிய அறிவிப்பொன்றை வெளியிட்டுள்ளது. வீட்டுவசதி மற்றும் நகர்ப்புற விவகார அமைச்சகம் இன்று அறிவித்துள்ளதன்படி, மாற்றுத்திறனாளிகளுக்கு (PwD) அரசு குடியிருப்பு விடுதிகளில் 4% இடஒதுக்கீடு வழங்கப்படும்.

இந்த ஒதுக்கீடு, டைப் V வரையிலான குடியிருப்பு வீடுகள் மற்றும் விடுதிகளில் பொருந்தும். இது, eSampada போர்டல் வழியாக நடத்தப்படும் மாதாந்திர தானியங்கி ஒதுக்கீட்டு அமைப்பின் (ASA) கீழ் வழங்கப்படும்.

இந்த தீர்மானம், மாற்றுத்திறனாளிகள் உரிமைகள் சட்டம், 2016 (RPwD Act) இன் கீழ் வரையறுக்கப்பட்ட குறைபாடுகள் உள்ள விண்ணப்பதாரர்களுக்கே வழங்கப்படும். அவர்கள், ஆரம்ப ஒதுக்கீடு மற்றும் தங்குமிட மாற்றம் ஆகிய இரண்டிலும் ஒரே காத்திருப்புப் பட்டியலில் முன்னுரிமை பெறுவார்கள்.

விண்ணப்பதாரர்கள், UDID (Unique Disability ID) கார்டுடன் தங்கள் சுயவிவரங்களை eSampada இணையதளத்தில் புதுப்பித்து பதிவேற்ற வேண்டும். பின்னர், அந்தந்த அமைச்சகம் அல்லது துறை, விண்ணப்பங்களை எஸ்டேட் இயக்குநரகத்திற்கு அனுப்பி ஒதுக்கீட்டை உறுதி செய்யும்.

மேலும், eSampada இணையதளத்தில் உருவாக்கப்பட்ட புதிய PwD பிரிவின் கீழ் விண்ணப்பதாரர்கள் விண்ணப்பிக்க வேண்டும்.

மத்திய வீடமைப்பு அமைச்சர் மனோகர் லால் கட்டர், இந்த அறிவிப்பை அனைவரையும் உள்ளடக்கிய நிர்வாகம் நோக்கிய “மைல்கல் படி” எனக் குறிப்பிட்டார்.

“மாற்றுத்திறனாளிகளுக்கு கண்ணியமான வாழ்க்கை மற்றும் சமத்துவ வாய்ப்புகளை வழங்குவதே எங்கள் நோக்கம். இந்த 4% இடஒதுக்கீடு மாற்றுத்திறனாளிகளின் உரிமைகளை உறுதிப்படுத்தும் வழியாக அமையும்,” என அவர் X (முன்னாள் ட்விட்டர்) இல் தெரிவித்தார்.