ஜிஎஸ்டி குறைப்பால் கார் விலை குறைவு – 5 லட்சம் ரூபாய் கார்களுக்கு ₹62,500 வரை சலுகை!

ஜிஎஸ்டி குறைப்பால் கார் விலை குறைவு – 5 லட்சம் ரூபாய் கார் ₹62,500 வரை மலிவு

அண்மையில் டெல்லியில் மத்திய நிதி அமைச்சர் நிர்மலா சீதாராமன் தலைமையில் நடைபெற்ற 56-ஆவது ஜிஎஸ்டி கவுன்சில் கூட்டத்தில், நான்கு அடுக்குகளாக இருந்த வரி அமைப்பு இரண்டு அடுக்குகளாக குறைக்கப்பட்டது. இதன் காரணமாக, சுமார் 353 பொருட்களின் விலை குறையவுள்ளது.

இதில் முக்கியமாக, கார் விலைகள் பெருமளவில் குறைய உள்ளது. தற்போது ஷோரூமில் ₹5 லட்சம் ரூபாய்க்கு விற்கப்படும் கார்களின் விலை, புதிய ஜிஎஸ்டி மாற்றத்தால் ₹62,500 வரை குறையக்கூடும் என கணிக்கப்பட்டுள்ளது.

ஜிஎஸ்டி மாற்றம் வரும் 22ஆம் தேதி அமலுக்கு வருகிறது. இதனால், கார்கள் மற்றும் இருசக்கர வாகனங்களின் விலைகளில் குறிப்பிடத்தக்க குறைவு ஏற்படும். குறிப்பாக, செஸ் வரி நீக்கப்பட்டதால் சொகுசு கார்களின் விலையும் குறையும்.

ஆனால், ஏற்கனவே செஸ் வரியைச் செலுத்தி விற்பனைக்காக கையிருப்பில் இருக்கும் கார்கள் சுமார் 6 லட்சம் என கூறப்படுகிறது. மஹிந்திரா, பிஎம்டபிள்யூ உள்ளிட்ட நிறுவனங்கள் மட்டும் சுமார் ₹4,000 கோடி அளவுக்கு செஸ் வரி கட்டியுள்ளதாகத் தகவல். இதனால், ஜிஎஸ்டி குறைப்பு பிறகு அந்தக் கார்களை விற்பனை செய்தால், நிறுவனங்களுக்கு இழப்பு ஏற்படும்.

இதனால், ஜிஎஸ்டி குறைப்பு அமலுக்கு வரும் முன்பே, 2% முதல் 4% வரை சலுகை விலையில் கார்களை விற்பனை செய்ய பல முன்னணி நிறுவனங்கள் திட்டமிட்டுள்ளன.