இந்தியா
சற்றுமுன் இனி ‘பிறப்புச் சான்றிதழ்’ கட்டாயம்.. மத்திய அரசின் அடுத்த அறிவிப்பு!
பாஸ்போர்ட்டுக்கு விண்ணப்பிக்கும் போது எப்படி பிறப்புச் சான்றிதழ் கட்டாயமோ, அதே போன்று அரசின் பல்வேறு ஆவணங்களைப் பெறவும் பிறப்புச் சான்றிதழ் கட்டாயம் ஆக்கும் திருத்த மசோதவை குளிர் கால கூட்டத்தின் போது மத்திய அரசு நிறைவேற்ற உள்ளது.
இந்த மசோதா நிறைவேற்றப்பட்டால், குழந்தைகளைக் கல்வி நிறுவனங்களில் சேர்ப்பது, வாக்காளர் அடையாள அட்டை வாங்குவது, மத்திய மற்றும் மாநில அரசு வேலைவாய்ப்புகள், ஓட்டுநர் உரிமம், பாஸ்போர்ட் போன்ற அரசு ஆவணங்களைப் பெற பிறப்புச் சான்றிதழைக் கட்டாயமாக ஆவணமாகச் சமர்ப்பிக்க வேண்டும் என தெரிவிக்கப்பட்டுள்ளது.
பிறப்புச் சான்றிதழை எல்லா ஆவணங்களையும் பெற பயன்படுத்துவதன் மூலம், அனைத்து தரவுகளும் மையமாக சேமிக்கப்பட்டு, 18 வயதை அடைந்தவுடன் தானாகவே வாக்காளர் பட்டியலில் சேர்க்கப்படும் என கூறப்படுகிறது.
பிறப்புச் சான்றிதழ் என்றால் என்ன? ஏன் பதிவு செய்ய வேண்டும்?
பிறப்புச் சான்றிதழ் குழந்தையின் குடியுரிமைக்கான சட்டப்பூர்வமான அத்தாட்சியாகும். பிறப்பு இறப்புப் பதிவுச் சட்டம் 1969-ம் படி, ஒரு குழந்தை பிறந்த 21 நாட்களுக்குள் அதற்கான விவரங்களைப் பதிவு செய்து பிறப்புச் சான்றிதழைப் பெற வேண்டும். மேலும் முழுமையாகப் பெயருடன் பெறப்படும் பிறப்புச் சான்றிதழ்தான் சட்டப்பூர்வமானது.
ஆன்லைனில் பிறப்புச் சான்றிதழைப் பதிவிறக்கம் செய்வது எப்படி?
சென்னை மருத்துவமனைகளில் பிறந்தவர்களின் பிறப்புச் சான்றிதழை https://chennaicorporation.gov.in/gcc/online-services/birth-certificate/ என்ற இணைப்பிற்குச் சென்று பதிவிறக்கம் செய்யலாம்.
பிற பகுதிகளில் உள்ள மருத்துவமனைகளில் பிறந்தவர்கள் https://www.etownpanchayat.com/publicservices/Home.aspx என்ற இணைப்பிற்குச் சென்று பிறப்புச் சான்றிதழைப் பதிவிறக்கம் செய்யலாம்.
பிறப்பு சான்றிதழ் பதிவிறக்கம் செய்யும் போது பிறந்த மாவட்டம், மருத்துவமனை, பாலினம், பிறந்த தேதி உள்ளிட்ட விவரங்கள் தெரிந்திருக்க வேண்டும். ஆனால் எந்த ஒரு கட்டணமும் இல்லாமல் ஆன்லைனில் இலவசமாகப் பிறப்புச் சான்றிதழைப் பதிவிறக்கம் செய்யலாம்.