சசிகலா வேடத்தில் நடிகை விஜி சந்திரசேகர்: ஜெயலலிதாவின் வாழ்க்கை தொடராக!

மறைந்த முன்னாள் தமிழக முதல்வர் ஜெயலலிதாவின் வாழ்க்கையை மையமாக வைத்து தொடர் ஒன்று எடுக்கப்பட்டு வருகிறது. இதில் ஜெயலலிதாவின் தோழி சசிகலாவாக நடிகை விஜி சந்திரசேகர் நடிக்கவுள்ளதாக தகவல்கள் வெளியாகி உள்ளது.

முன்னாள் முதல்வர் ஜெயலலிதா கடந்த 2016-ஆம் ஆண்டு டிசம்பர் 5-ஆம் தேதி சென்னை அப்பல்லோ மருத்துவமனை மரணமடைந்தார். இதனையடுத்து அவரது வாழ்க்கை வரலாற்றை திரைப்படமாக எடுக்க பல இயக்குநர்கள் முயற்சி செய்து வருகின்றனர். இந்நிலையில் இயக்குநர் கவுதம் மேனன் ஜெயலலிதாவின் வாழ்க்கையை தொடராக இயக்கி வருகிறார்.

இந்த தொடரின் படப்பிடிப்பு சென்னையில் நடைபெற்று வரும்நிலையில் இதில் ஜெயலலிதாவாக நடிகை ரம்யாகிருஷ்ணன் நடித்து வருகிறார். ஆனால் ஜெயலலிதாவின் தோழி சசிகலா வேடத்தில் நடிக்க உள்ளவர் குறித்த தகவல் வெளியாகமலே இருந்தது. சர்ச்சைக்குறிய கதாப்பாத்திரம் என்பதால் பல நடிகைகள் இதில் நடிக்க தயக்கம் காட்டினர்.

இந்நிலையில் சசிகலா வேடத்தில் நடிகை விஜி சந்திரசேகர் ஒப்பந்தமாகியுள்ளார். இத்தொடரில் சோபன் பாபு வேடத்தில் வம்ஷி கிருஷ்ணாவும், எம்ஜிஆர் வேடத்தில் இந்திரஜித்தும் நடிக்கவுள்ளனர். இந்த ஜெயலலிதா வாழ்க்கை தொடர் வெப் சீரிஸாக இணையத்தில் வெளியாக வாய்ப்புள்ளதாக கூறப்படுகிறது.