‘கர’ பாக்ஸ் ஆபிஸ் வசூல் நாள் 2: உலகளவில் ரூ.20 கோடியை நெருங்கிய தனுஷ் படம்!

நடிகர் தனுஷ் நடித்துள்ள ‘கர’ திரைப்படம் சமீபத்தில் வெளியாகி ரசிகர்கள் மத்தியில் கலவையான வரவேற்பை பெற்று வருகிறது. ‘போர் தொழில்’ திரைப்படத்தின் மூலம் கவனம் பெற்ற இயக்குநர் விக்னேஷ் ராஜா இயக்கியுள்ள இந்த படம், வித்தியாசமான ஹீஸ்ட் த்ரில்லர் கதைக்களத்தில் உருவாகியுள்ளது.

கடந்த ஏப்ரல் 30ஆம் தேதி வெளியான இந்த படத்தில், தனுஷுக்கு ஜோடியாக மலையாள நடிகை மமிதா பைஜு நடித்துள்ளார். இதுவரை க்யூட் ஹீரோயின் தோற்றத்தில் மட்டுமே ரசிகர்களால் பார்க்கப்பட்ட மமிதா, இந்த படத்தில் கிராமத்து பெண் மற்றும் குடும்பப் பெண் கதாப்பாத்திரத்தில் வித்தியாசமான நடிப்பை வெளிப்படுத்தியுள்ளார்.

எப்போதும் புதுமையான கதைகளை தேர்வு செய்து நடித்து வரும் தனுஷுக்கு, ‘கர’ திரைப்படமும் வித்தியாசமான கதாப்பாத்திர அனுபவமாக அமைந்துள்ளது. படத்தில் கருணாஸ், கே.எஸ்.ரவிகுமார், பிரித்வி உள்ளிட்ட பலரும் முக்கிய வேடங்களில் நடித்துள்ளனர்.

ஐசரி கணேஷ் தயாரித்துள்ள இந்த திரைப்படத்திற்கு ஜிவி பிரகாஷ் இசையமைத்துள்ளார். குறிப்பாக பின்னணி இசை மற்றும் பாடல்கள் படத்தின் முக்கிய பலமாக இருப்பதாக ரசிகர்கள் கருத்து தெரிவித்து வருகின்றனர்.

திரைப்படம் குறித்து ரசிகர்களிடையே கலவையான விமர்சனங்கள் நிலவுகின்றன. சிலர் படத்தின் திரைக்கதை மற்றும் தனுஷின் நடிப்பை பாராட்டி வருகிறார்கள். அதேசமயம், இன்னும் சிலர் படம் எதிர்பார்த்த அளவுக்கு இல்லையென கருத்து தெரிவித்து வருகின்றனர்.

இந்நிலையில், ‘கர’ திரைப்படம் வெளியான இரண்டு நாட்களில் உலகளவில் சுமார் ரூ.20 கோடி வரை வசூல் செய்துள்ளதாக தகவல்கள் வெளியாகியுள்ளன. இருப்பினும், இதுகுறித்த அதிகாரப்பூர்வ அறிவிப்பு இன்னும் வெளியாகவில்லை என்பது குறிப்பிடத்தக்கது.