8வது ஊதியக்குழு அப்டேட்: ஃபிட்மெண்ட் ஃபாக்டர் 1.60க்கு கீழே இல்லை – ஊதிய உயர்வுக்கு பெரிய சிக்னல்!

மத்திய அரசு ஊழியர்களும் ஓய்வூதியதாரர்களும் எதிர்பார்த்து காத்திருக்கும் 8வது ஊதியக்குழு குறித்து புதிய தகவல்கள் வெளியாகி வருகின்றன. குறிப்பாக, ஊதிய உயர்வை தீர்மானிக்கும் முக்கிய அம்சமான ஃபிட்மெண்ட் ஃபாக்டர் குறித்து அதிக கவனம் செலுத்தப்பட்டு வருகிறது.

7வது ஊதியக்குழுவின் பரிந்துரைகள் நிறைவடைந்த நிலையில், அடுத்த கட்டமாக 8வது ஊதியக்குழுவின் அமலாக்கம் குறித்து எதிர்பார்ப்பு அதிகரித்துள்ளது. புதிய ஊதிய அமைப்பு எவ்வாறு இருக்கும் என்பது குறித்து ஊழியர்கள் தீவிரமாக கவனித்து வருகின்றனர்.

சமீபத்திய அகவிலைப்படி (DA) தரவுகள், 8வது ஊதியக்குழுவில் ஃபிட்மெண்ட் ஃபாக்டர் குறித்த ஒரு முக்கிய அறிகுறியை வழங்கியுள்ளன. தற்போதைய கணக்கீடுகளின்படி, இந்த ஃபாக்டர் 1.60க்கு கீழே குறைய வாய்ப்பில்லை என நிபுணர்கள் மதிப்பிடுகின்றனர்.

தற்போது மத்திய அரசு ஊழியர்களுக்கு வழங்கப்படும் அகவிலைப்படி சுமார் 58% ஆக உள்ளது. ஜனவரி 2026-க்கு பிறகு இது 60% ஆக அதிகரிக்கும் என எதிர்பார்க்கப்படுகிறது. தொழிலாளர் பணியகத்தின் CPI-IW தரவுகளின்படி, அகவிலைப்படி 60.34% வரை உயர்ந்துள்ளது. நடைமுறையில் இது 60% ஆக மாற்றப்படலாம்.

ஊதியக்குழு கணக்கீட்டு முறையில், அடிப்படை ஊதியத்துடன் அகவிலைப்படி சேர்த்து கணக்கிடப்படும் பெருக்கி தான் ஃபிட்மெண்ட் ஃபாக்டர். உதாரணமாக, அடிப்படை ஊதியம் 100 என்றால், 60% DA சேர்க்கப்பட்டால் அது 160 ஆக மாறும். இதன் அடிப்படையில் ஃபிட்மெண்ட் ஃபாக்டர் 1.60 ஆக நிர்ணயிக்கப்படுகிறது.

ஆனால், இது குறைந்தபட்ச அளவாக மட்டுமே பார்க்கப்படுகிறது. கோவிட்-19 காலத்தில் 18 மாதங்களுக்கு அகவிலைப்படி உயர்வுகள் நிறுத்தப்பட்டிருந்தது. அந்த இழப்புகளை கருத்தில் கொண்டால், உண்மையான ஃபிட்மெண்ட் ஃபாக்டர் இதைவிட அதிகமாக இருக்க வேண்டும் என்று பல ஆய்வாளர்கள் கருத்து தெரிவிக்கின்றனர்.

மேலும், 8வது ஊதியக்குழுவின் பரிந்துரைகள் நடைமுறைக்கு வர சில காலம் ஆகக்கூடும். இதற்கிடையில் பணவீக்கம் மற்றும் அகவிலைப்படி தொடர்ந்து அதிகரித்தால், மொத்த DA 80% முதல் 90% வரை செல்லும் வாய்ப்பும் உள்ளது.

அப்படி நடந்தால், ஃபிட்மெண்ட் ஃபாக்டர் 1.8 முதல் 1.9 வரை உயரக்கூடும் என நிபுணர்கள் கணிக்கின்றனர். இது மத்திய அரசு ஊழியர்களின் அடிப்படை சம்பளம், அலவன்ஸ்கள் மற்றும் ஓய்வூதியத்தில் பெரிய மாற்றங்களை ஏற்படுத்தும்.

இதனால், ஊழியர் சங்கங்கள் ஏற்கனவே அதிகமான ஊதிய உயர்வை கோரி வருகின்றன. பணவீக்கம் மற்றும் கடந்த கால DA இழப்புகளை ஈடுசெய்யும் வகையில் உயர்ந்த ஃபிட்மெண்ட் ஃபாக்டர் வழங்கப்பட வேண்டும் என்பதே அவர்களின் கோரிக்கையாக உள்ளது.