மெக்சிகோ, கனடா, சீனாவுக்கு புதிய வரி..! டிரம்ப் அதிரடி முடிவு..!

டிரம்ப் அதிரடி – கனடா, மெக்சிகோ, சீனாவுக்கு புதிய வரி விதிப்பு..!

அமெரிக்க அதிபர் டொனால்டு டிரம்ப், கனடா, மெக்சிகோ மற்றும் சீனாவில் இருந்து இறக்குமதி செய்யப்படும் பொருட்களுக்கு புதிய வரி விதித்துள்ளதாக அறிவித்துள்ளார். இந்த புதிய வரி திட்டத்தின் படி, கனடா மற்றும் மெக்சிகோவில் இருந்து வரும் பொருட்களுக்கு 25% வரியும், சீனாவில் இருந்து வரும் பொருட்களுக்கு 10% வரியும் விதிக்கப்படும் என்று வெள்ளை மாளிகை தெரிவித்துள்ளது.

இத்திட்டம் அமெரிக்கக் குடும்பங்களுக்கும் நுகர்வோருக்கும் சிரமத்தை ஏற்படுத்தக்கூடும் என்பதை ஒப்புக்கொண்ட போதிலும், அமெரிக்காவின் பொருளாதார பாதுகாப்பு மற்றும் எல்லை கட்டுப்பாடுகளை உறுதிப்படுத்த இந்த நடவடிக்கையை அமல்படுத்தியதாக டிரம்ப் கூறியுள்ளார்.

அமெரிக்க எல்லை பாதுகாப்பு மற்றும் போதைப்பொருள் கடத்தலை கட்டுப்படுத்தும் வரை இந்த புதிய வரி திட்டம் தொடரும் என்றும், கனடா மற்றும் மெக்சிகோ அரசு அமெரிக்காவின் பாதுகாப்பு நடவடிக்கைகளுக்கு ஒத்துழைக்கும்வரை இந்த வரிகள் நீக்கப்படாது என்றும் டிரம்ப் அறிவித்துள்ளார்.

இதற்கு பதிலளித்த கனடா பிரதமர் ஜஸ்டின் ட்ரூடோ, கனடா மீது எந்தவொரு வரியும் விதிக்கப்பட்டால், அதற்கான பதிலடி கடுமையாகவும், தகுதியான முறையில் அமையவும் இருக்கும் எனக் கூறியுள்ளார்.

இந்த புதிய வரி நடவடிக்கைகள் உலகளாவிய வர்த்தகத் தொடர்புகளை பாதிக்கும் அபாயம் உள்ளதாக பொருளாதார நிபுணர்கள் எச்சரித்துள்ளனர்.