2025 செப்டம்பர் 7 அன்று இந்தியாவில் முழு சந்திர கிரகணம் – ரத்த நிலவு காட்சி!

2025 ஆம் ஆண்டில் மொத்தம் நான்கு கிரகணங்கள் நிகழ உள்ளன. இதில், ஏற்கனவே ஒரு சூரிய கிரகணமும் ஒரு சந்திர கிரகணமும் முடிந்துவிட்டது. அடுத்ததாக, செப்டம்பர் 7, 2025 அன்று முழு சந்திர கிரகணம் இந்தியாவில் காணக்கூடியதாக உள்ளது.

இந்த சந்திர கிரகணம் இரவு 9:58 மணிக்கு தொடங்கி, அதிகாலை 1:26 மணிக்கு (செப்டம்பர் 8) முடிவடையும். அதிகபட்ச கிரகண நேரம் இரவு 11:42 ஆகும். மொத்தம் 3 மணி நேரம் 28 நிமிடங்கள் நீடிக்கும் இந்த வானியல் நிகழ்வை இந்தியா முழுவதும் வெறும் கண்களால் பார்க்க முடியும்.

சந்திர கிரகணத்தின் போது, பூமி சூரியன் மற்றும் சந்திரன் இடையில் வந்து, தனது நிழலை சந்திரனின் மீது போட்டுவிடும். இதனால், நிலவு ரத்த நிறத்தில் (Blood Moon) காட்சி தரும். இந்த ரத்த நிலவு காட்சி வானியல் ஆர்வலர்களுக்கு ஒரு அபூர்வமான அனுபவமாக இருக்கும்.

முந்தைய சந்திர கிரகணம் 2025 மார்ச் மாதத்தில் நிகழ்ந்தாலும், அது இந்தியாவில் தெரியவில்லை. ஆனால் இந்த முறை, இந்தியாவின் வடக்கு (டெல்லி, லக்னோ, சண்டிகர்), மேற்கு (மும்பை, புனே, அகமதாபாத்), தெற்கு (சென்னை, பெங்களூரு, ஹைதராபாத், கொச்சி), கிழக்கு (கொல்கத்தா, புவனேஸ்வர், கௌஹாத்தி), மற்றும் மத்திய இந்தியா (போபால், நாக்பூர், ராய்ப்பூர்) போன்ற நகரங்களிலெல்லாம் முழுமையாக பார்க்க முடியும்.