டிக்கெட் இல்லாமல் பயணம் செய்ய இந்த ரயிலுக்கு போங்க.

இந்தியாவில் பெரும்பாலும் நீண்ட வரிசைகள், கூட்ட நெரிசல்கள் டிக்கெட் ஆப்கள் மற்றும் கடைசி நேர பயண பதட்டம் போன்றவற்றை நினைவுபடுத்துகிற விதமாகத்தான் ரயில் பயணங்கள் பொதுவாக இருக்கும்.

ஆனால், நம் நாட்டில் அமைதியாகத் தனித்து நிற்கும் ஒரு ரயில் சேவை இருக்கிறது  இந்த ரயிலானது டிக்கெட்டுகள், அபராதங்கள் அல்லது அறிவிப்புகள் எதுவுமின்றி இயக்கப் படுகிறது. இதை கேட்கும்போது உங்களுக்கு ஆச்சரியமாக இருக்கலாம்.

இந்த விசித்திரமான ரயில் பஞ்சாப் மற்றும் இமாச்சலப் பிரதேசத்திற்கு இடையே தினமும் இயக்கப்படுகிறது. இந்த ரயிலின் பயணப் பாதை, ஒரு வழக்கமான ரயில் பயணத்தை விட, மெதுவாக நகரும் ஒரு அஞ்சல் அட்டையைப் போன்ற உணர்வைத் தருகிறது. இது சட்லஜ் நதியைக் கடந்து செல்கிறது, சிவாலிக் மலைகளின் ஓரமாகப் பயணிக்கிறது. இது மெதுவாக செல்லும். மற்ற பயணிகள் ரயில்களைப் போலவே தெரியும். ஆடம்பர அடையாளங்கள் எதுவும் இல்லை.  மலைகள், நீர்நிலைகள் மற்றும் அமைதியான நகரங்கள் வழியாகச் செல்லும் எஃகு தண்டவாளங்கள் மட்டுமே உள்ளன. பயணிகள் அவசரம் ஏதும் இல்லாமல் நிதானமாக ஏறுகிறார்கள். டிக்கெட் கவுண்டர்கள் கிடையாது. இருக்கை எண்களுக்காக செல்போன்களைச் சரிபார்க்க வேண்டிய தில்லை. முதல்முறையாக இந்த ரயிலை பயன்படுத்துபவர்களுக்கு இவற்றை எல்லாம் பார்க்க மிகவும் விசித்திரமாக தோன்றும். ஆனால், உள்ளூர் மக்களுக்கு இந்த ரயில்  மிகவும் பழக்கப் பட்ட ஒன்று தான்

வழித்தடம் குறுகியதாக இருந்தாலும், கண்கொள்ளா காட்சிகளை வழங்குகிறது. இந்த ரயிலில் சென்றால் நதிக்கரைக் காட்சிகள், அடர்ந்த வனப் பகுதிகளை பார்த்து ரசிக்கலாம் பாறைகளில் செதுக்கப்பட்ட குறுகிய சுரங்கப்பாதைகள் வழியாக இந்த ரயில் செல்கிறது. சிறிய ரயில் நிலையங்களில் நின்று செல்கிறது. உண்மையில் இந்த பயணம்  வரலாற்றின் ஊடான ஒரு பயணம் ஆகும்.

இந்த ரயிலின் பெட்டிகள் மரத்தாலான அலங்காரப் பொருட்களும், பழங்கால ஜன்னல்களும் கொண்டவையாக உள்ளன. இந்த ரயில் பெட்டிகளில் சில, சுதந்திரத்திற்கு முன்பும், எல்லைகள் மாறுவதற்கு முன்பும், நவீன ரயில் பயணம் பரவலாவதற்கு முன்பும் கட்டப்பட்டவை என்று சொல்லப்படுகிறது.

இந்த ரயில் சேவையை இன்னும் நம்ப முடியாததாக்குவது எது தெரியுமா? இந்த ரயிலில் பயணிக்க பயணக் கட்டணம் என்பதே துளியும் இல்லை. ஆம் டிக்கெட் பரிசோதகர் வந்து டிக்கெட் கேட்டு அபராதம் விதிக்கமாட்டார். இந்த ரயில் இயங்க எரிபொருள் செலவாகிறது, பராமரிப்பு, ஊழியர்கள் மற்றும் நிர்வாகச் செலவுகள் செய்யப்படுகின்றன, ஆனாலும் பயணிகள் இதில் பயணிக்க எந்த கட்டணமும் வசூலிக்கப்படுவதில்லை

இந்த ரயில் இந்திய ரயில்வேயால் இயக்கப்படவில்லை. இந்தச் சேவையானது ஒரு பெரிய உள்கட்டமைப்புத் திட்டத்துடன் தொடர்புடைய ஒரு அரசு அதிகார அமைப்பால் இயக்கப் படுகிறது. பல ஆண்டுகளாக இது தொடர்ந்து இலவசமாகவே இயங்கி வருகிறது. இந்த ரயிலின் பெயர் பக்ரா–நங்கல் (Bhakra–Nangal) ஆகும். இந்த ரயில் பஞ்சாப் மற்றும் இமாச்சலப் பிரதேசத்திற்கு இடையே 75 ஆண்டுகளுக்கும் மேலாக இயங்கி வருகிறது.

ஆரம்பத்தில் அணை கட்டுமானத்திற்காக இயக்கப்பட்ட இந்த ரயில், உள்ளூர் பயணிகளுக்கு (மாணவர்கள், கிராமவாசிகள்) ஆதரவளிக்கவும், வரலாற்றுச் சிறப்புமிக்க பக்ரா அணை சுற்றுலாவை ஊக்குவிக்கவும், வருமானம் ஈட்டும் சேவையாக இல்லாமல், ஒரு கலாச்சாரச் சின்னமாக பாரம்பரியத்தைப் பேணவும் தொடர்ந்து இலவசமாக இயக்கப்பட்டு வருகிறது.