வணிகம்
ஜொமாட்டோவுக்கு போட்டியாக ஓலா.. 10 நிமிடத்தில் டெலிவரி சாத்தியமா?
ஜொமாட்டோவின் 10 நிமிட டெலிவரி சேவைக்கு போட்டியாக, ஓலா நிறுவனமும் பெங்களூருவில் 10 நிமிடத்தில் உணவு டெலிவரி செய்யத் திட்டமிட்டுள்ளதாகத் தெரிவித்துள்ளது.
பெங்களூருவில் குறிப்பிட்ட சில இடங்களில் ஓலா டேஷ், ஓலா குவிக் சேவைகள் மூலமாகக் கிச்சடி, பிசா மற்றும் ரோல்ஸ் உணவுகளை 10 நிமிடத்தில் டெலிவரி செய்யும் சேவையை சோதனை முயற்சியாக ஓலா அறிமுகம் செய்ய உள்ளது.
அதற்காக ரோபாட்டிக்ஸ் உணவு ஸ்டார்ட் அப் நிறுவனமான முகுந்தா ஃபுட்ஸ் நிறுவனத்துடன் ஓலா ஒப்பந்தமும் போட்டுள்ளது. ஜொமாட்டோ, ஸ்விகி நிறுவனங்களும் பேச்சுவார்த்தையில் ஈடுபட்டு வருவதாகக் கூறப்படுகிறது.
முகுந்தா ஃபுட்ஸ் நிறுவனம் ரோபாட்ஸ் உதவியுடன் சமையல் செய்வதால், சில இந்திய, சைனீஸ் உணவுகளைச் சமைப்பதற்கான நேரம் 20 முதல் 50 சதவீதம் குறையும் என கூறப்படுகிறது.
சென்னையில் ஜொமாட்டோவின் 10 நிமிட டெலிவரி சேவைக்கு எதிராக வழக்குகள் தொடரப்பட்ட நிலையில் ஓலா நிறுவனம் 10 நிமிடத்தில் டெலிவரி செய்யும் சேவையை பெங்களூருவில் அறிமுகம் செய்கிறது.
10 நிமிடத்தில் ஆர்டர்களை டெலிவரி செய்ய வேண்டும் என்பது ஊழியர்களுக்கு மன அழுத்தத்தை ஏற்படுத்தும் என கூறப்பட்டது. 10 நிமிட டெலிவரி ஆர்டர்கள் தாமதமாக டெலிவரி செய்யப்பட்டால் அபராதம் விதிக்கப்படாது என ஜொமாட்டோ தலைமை செயல் அதிகாரி தீபிந்தர் கோயல் கூறியுள்ளார். மேலும் அதிக டிமாண்ட் உள்ள உணவுகளைக் கணித்து டெலிவரி செய்வதற்கான வழிமுறைகளை ஆராய்ந்து வருவதாகவும் அவர் தெரிவித்துள்ளார்.
இந்த வேகம் எங்கு சென்று முடியும் என்பதை சமூக வலைத்தளங்களில் பகிர்ந்து கருத்துக்களைத் தெரிவிக்கவும்.