நீரிழிவு, சிறுநீரக நோய்கள் இதய செயலிழப்பை அமைதியாக அதிகரிக்கிறது: மருத்துவர்கள் எச்சரிக்கை!

நாள்பட்ட நோய்கள் மனித உயிருக்கு மிகப்பெரிய ஆபத்தை ஏற்படுத்தும் என்பதில் எந்த சந்தேகமும் இல்லை என்று மருத்துவர்கள் எச்சரிக்கின்றனர். குறிப்பாக, நீரிழிவு மற்றும் சிறுநீரக நோய்கள் நேரடியாகவே இதய செயலிழப்பு அபாயத்தை மெதுவாகவும் அமைதியாகவும் அதிகரிக்கக்கூடியவை எனக் கூறப்படுகிறது.

இதயம், சிறுநீரகங்கள் மற்றும் ரத்த நாளங்கள் ஆகிய மூன்றும் ஒன்றோடொன்று ஆழமாக தொடர்புடைய உறுப்புகளாக செயல்படுகின்றன. இதில் ஏதாவது ஒரு உறுப்பின் செயல்பாடு பாதிக்கப்பட்டால், அதன் தாக்கம் மற்ற உறுப்புகளிலும் தவிர்க்க முடியாத வகையில் வெளிப்படும். இன்சுலின் ரெசிஸ்டென்ஸ், ஹார்மோன் சமநிலை சீர்கேடு போன்ற பொதுவான காரணிகள் இந்த உறுப்புகளுக்கிடையிலான பாதிப்பை மேலும் தீவிரப்படுத்துகின்றன.

நீரிழிவு நோயாளிகளில் காணப்படும் அதிகப்படியான ரத்த சர்க்கரை அளவு, இதய தசை செல்களை நேரடியாக சேதப்படுத்துகிறது. இதன் காரணமாக இதயம் சுருங்கி விரியும் (contraction) செயல்பாட்டில் தடைகள் உருவாகி, இதயத்தின் திறன் படிப்படியாக குறையத் தொடங்குகிறது. இதயம், சிறுநீரகம் மற்றும் மெட்டபாலிக் கோளாறுகள் இணைந்து உருவாகும் இந்த நிலை மருத்துவ உலகில் ‘Cardio-Renal-Metabolic Syndrome’ என அழைக்கப்படுகிறது. இந்த நோய்க்குறி, காலப்போக்கில் இதயத்தை அறியாமலேயே பலவீனப்படுத்தும் அபாயத்தை உருவாக்குகிறது.

இதயவியல் சிறப்பு மருத்துவர் இதுகுறித்து பேசுகையில், “நீரிழிவு நோய் முதலில் ரத்த நாளங்களை சேதப்படுத்துகிறது. நீண்ட காலமாக அதிகமாக இருக்கும் ரத்த சர்க்கரை அளவு, ரத்த நாளங்களை கடினமாக மாற்றி ரத்த ஓட்டத்தை பாதிக்கிறது. அதே நேரத்தில், கழிவுகளை வடிகட்டி வெளியேற்றும் முக்கிய பணி கொண்ட சிறுநீரகங்கள், ஆரோக்கியமான ரத்த நாளங்களின் செயல்பாட்டையே முழுமையாக நம்பியுள்ளன” என்கிறார்.

மேலும் அவர், “இந்த இயல்பு பாதிக்கப்பட்டால், உடலில் நச்சுகள் மற்றும் அதிகப்படியான திரவம் தமனிகளில் குவிந்து, இதயம் அதிகமாக உழைக்க வேண்டிய நிலை உருவாகிறது. இதனால் நீரிழிவு நோய் ரத்த நாளங்களுக்கும் சிறுநீரகங்களுக்கும் தீங்கு விளைவிப்பதுடன், தொடர்ந்து ஏற்படும் அழுத்தம் இதய தசையை பலவீனப்படுத்தி இறுதியில் இதய செயலிழப்புக்கு வழிவகுக்கிறது” என்றும் விளக்குகிறார்.

எனவே, நீரிழிவு மற்றும் சிறுநீரக நோய்களை அலட்சியப்படுத்தாமல், ஆரம்ப நிலையிலேயே கட்டுப்படுத்துவது இதய ஆரோக்கியத்தை பாதுகாப்பதற்கு மிக அவசியம் என மருத்துவர்கள் வலியுறுத்துகின்றனர்.