மே மாத உரிமைத்தொகை வரவு: 60 வயதுக்கு மேற்பட்ட பெண்களுக்கு கூடுதல் நிதியுதவி? தமிழ்நாடு அரசு புதிய கணக்கெடுப்பு தொடக்கம்!

தமிழ்நாட்டில் மகளிர் நலத்திட்டங்களை விரிவுபடுத்தும் நடவடிக்கையாக, 60 வயதுக்கு மேற்பட்ட பெண்களை அடையாளம் காணும் புதிய கணக்கெடுப்பு பணியை அரசு தொடங்கியுள்ளது. இந்த நடவடிக்கை, மகளிர் உரிமைத்தொகை திட்டத்தை மேம்படுத்தும் முயற்சியின் ஒரு பகுதியாக பார்க்கப்படுகிறது.

சமீபத்தில் மே மாதத்திற்கான ரூ.1,000 மகளிர் உரிமைத்தொகை, மாநிலம் முழுவதும் சுமார் 1 கோடியே 31 லட்சம் பெண்களின் வங்கிக் கணக்குகளில் வரவு வைக்கப்பட்டது. இதன் மூலம் பெண்களுக்கான நிதி ஆதரவு திட்டம் தொடர்ந்து செயல்படுத்தப்பட்டு வருகிறது.

சட்டமன்ற தேர்தலின் போது வெளியிடப்பட்ட தேர்தல் அறிக்கையில், பெண்களுக்கு மாதம் ரூ.2,500 உதவித்தொகை மற்றும் 60 வயதுக்கு மேற்பட்டவர்களுக்கு ரூ.3,000 ஓய்வூதியம் வழங்கப்படும் என அறிவிக்கப்பட்டிருந்தது. இதனை செயல்படுத்துவதற்கான மறுசீரமைப்பு பணிகள் நடைபெற்று வருவதாக முதலமைச்சர் ஜோசப் விஜய் முன்பே தெரிவித்திருந்தார்.

இந்நிலையில், சமூக நலத்திட்டங்களின் கீழ் ஏற்கனவே பலன்கள் பெற்று வரும் 60 வயதுக்கு மேற்பட்ட பெண்களின் விவரங்களை சேகரிக்கும் பணியை தமிழ்நாடு அரசு தீவிரப்படுத்தியுள்ளது. இந்த கணக்கெடுப்பு மூலம், எதிர்காலத்தில் முதிய பெண்களுக்கு கூடுதல் உதவித்தொகை அல்லது புதிய நலத்திட்டங்கள் அறிவிக்கப்படலாம் என எதிர்பார்க்கப்படுகிறது.

மேலும், தற்போதைய “மகளிர் உரிமைத்தொகை திட்டம்” என்ற பெயரை “மதிப்புமிகு மகளிர் திட்டம்” என மாற்றுவது குறித்தும் அரசு ஆலோசித்து வருவதாக தகவல்கள் வெளியாகியுள்ளன.

பெண்களின் பொருளாதார முன்னேற்றம் மற்றும் முதியோரின் வாழ்க்கைத் தரத்தை உயர்த்தும் நோக்கில் இந்த நடவடிக்கைகள் மேற்கொள்ளப்படுவதாக கூறப்படுகிறது.