ஜனவரி 30–31: சென்னை மாநகரில் 24 மணி நேர குடிநீர் விநியோகம் நிறுத்தம்

சென்னை மாநகரின் பல பகுதிகளில், சென்னை மெட்ரோ ரயில் நிறுவனம் (CMRL) மேற்கொள்ளும் பூமிக்கடிநிலை குழாய் இணைப்பு பணிகள் காரணமாக, ஜனவரி 30 முதல் ஜனவரி 31, 2026 வரை 24 மணி நேரத்திற்கு குடிநீர் விநியோகம் தற்காலிகமாக நிறுத்தப்படும் என சென்னை மாநகர குடிநீர் மற்றும் கழிவுநீர் வாரியம் (CMWSSB) அறிவித்துள்ளது.

இந்த குடிநீர் விநியோகம் நிறுத்தம், ஜனவரி 30 காலை 10 மணி முதல் ஜனவரி 31 காலை 10 மணி வரை நடைபெறும். இதன் காரணமாக, மண்டலம் 9 (தேனாம்பேட்டை), மண்டலம் 10 (கோடம்பாக்கம்) மற்றும் மண்டலம் 13 (அடையார்) ஆகிய பகுதிகளுக்குட்பட்ட தேர்ந்தெடுக்கப்பட்ட இடங்களில் குடிநீர் விநியோகம் பாதிக்கப்படும்.

இதனை முன்னிட்டு, பாதிக்கப்படும் பகுதிகளில் வசிக்கும் பொதுமக்கள் முன்னெச்சரிக்கையாக போதிய அளவு குடிநீரை சேமித்து வைத்துக் கொள்ள சென்னை மெட்ரோ வாட்டர் நிர்வாகம் அறிவுறுத்தியுள்ளது.

அவசர தேவைக்காக, குடிநீர் டேங்கர் சேவையைப் பெற விரும்புவோர், சென்னை மெட்ரோ வாட்டர் அதிகாரப்பூர்வ இணையதளம் cmwssb.tn.gov.in மூலம் “Dial for Water” சேவையில் பதிவு செய்து பயன்பெறலாம்.

மேலும், குடிநீர் இணைப்பு இல்லாத பகுதிகளுக்கும், குறைந்த அழுத்தம் உள்ள பகுதிகளுக்கும் வழங்கப்படும் டேங்கர் மூலம் குடிநீர் விநியோகம் வழக்கம்போல் எந்தத் தடையும் இன்றி தொடரும் என்றும் அதிகாரிகள் உறுதியளித்துள்ளனர்.