‘தேன்’ படத்திற்கு ஏஜிஎஸ் நிறுவனம் அளித்த அதிரடி சலுகை!

இயக்குனர் கணேஷ் விநாயக் இயக்கத்தில் தரன் குமார் மற்றும் அபர்நதி தீத்யா நடித்த ’தேன்’ என்ற திரைப்படம் நாளை வெளியாக உள்ளது. இந்த படத்தின் பத்திரிக்கையாளர் காட்சி இன்று திரையிடப்பட்ட நிலையில் அனைத்து பத்திரிகைகளும் இந்தப் படத்தை பார்த்து பாராட்டி வருகின்றன என்பது குறிப்பிடத்தக்கது.

இந்த படம் கிராமத்து பின்னணியில் அமைந்துள்ள ஒரு அழகான காதல் படம் என்றும், இந்த படம் மிகப்பெரிய வெற்றி அடையும் என்று எதிர்பார்க்கப்படுகிறது. இந்த நிலையில் இந்த படத்திற்காக ஒரு சிறப்பு சலுகையை ஏஜிஎஸ் நிறுவனம் வழங்கியுள்ளது. இந்த படத்தின் ரிலீஸ் உரிமையை பெற்றுள்ள ஏஜிஎஸ் நிறுவனம், ஏஜிஎஸ் திரையரங்குகளில் இந்த படத்தை பார்க்க வருபவர்களுக்கு 100 ரூபாய் மட்டுமே கட்டணம் என அறிவித்துள்ளது.

மற்ற படங்களுக்கு ரூபாய் 200க்கும் மேல் கட்டணம் இருக்கும் ஏஜிஎஸ் திரையரங்கில் ’தேன்’ படத்திற்கு மட்டும் ரூ.100 என்ற சலுகை அறிவிக்கப்பட்டுள்ளதால் இந்த படத்தை அதிக நபர்கள் பார்க்க வருவதற்கு உதவியாக இருக்கும் என்று எதிர்பார்க்கப்படுகிறது.

ஒரு நல்ல திரைப்படம் அனைத்து தரப்பினரையும் சென்று சேரவேண்டும் என்பதற்காகவே இந்த சலுகை வழங்கப்பட்டுள்ளது என்பது குறிப்பிடத்தக்கது. நல்ல கதையம்சம் உள்ள இதுபோன்ற சிறிய படங்களுக்கு பொதுமக்களும் ரசிகர்களும் ஆதரவு கொடுத்தால் தான் இதுபோன்ற திரைப்படங்கள் அதிகம் வெளிவரும் என்றும் திரையுலகினர் கூறி வருகின்றனர். அதன் ஒரு முயற்சியாகத்தான் ’தேன்’ படத்திற்கு ரூபாய் 100 கட்டணம் வசூலிக்கப்படுகிறது என்பது குறிப்பிடத்தக்கது.