கர்நாடகாவில் 693 நாட்கள் ஓடிய கமல் படம்: 48 ஆண்டுகளாக முறியடிக்கப்படாத ‘மரோ சரித்திரா’ சாதனை!

நடிகர் கமல்ஹாசன் மற்றும் இயக்குநர் கே.பாலசந்தர் கூட்டணியில் உருவான ‘மரோ சரித்திரா’ திரைப்படம் இந்திய சினிமா வரலாற்றில் இன்றளவும் பேசப்படும் சாதனையை படைத்துள்ளது. 1978ஆம் ஆண்டு வெளியான இந்த படம், கர்நாடகாவில் தொடர்ந்து 693 நாட்கள் ஓடி அசாதாரண வெற்றியை பெற்றது. முக்கியமாக, கடந்த 48 ஆண்டுகளாக இந்த சாதனையை எந்த திரைப்படமும் முறியடிக்க முடியவில்லை என்பது குறிப்பிடத்தக்கது.

இயக்குநர் கே.பாலசந்தர் இயக்கத்தில் கமல்ஹாசன் மற்றும் சரிதா நடித்த இந்த படம் முதலில் தெலுங்கில் உருவாக்கப்பட்டது. தமிழ் இளைஞனும் தெலுங்கு பெண்ணும் காதலிக்கும் கதையை மையமாகக் கொண்ட இந்த திரைப்படம், காதல், குடும்ப எதிர்ப்பு மற்றும் சோக நிறைவு ஆகிய உணர்வுகளை ஆழமாக பதிவு செய்தது.

‘மரோ சரித்திரா’ திரைப்படம் ஆந்திரப் பிரதேசம் மட்டுமல்லாமல் தமிழ்நாடு மற்றும் கர்நாடகாவிலும் மொழிமாற்றம் செய்யாமல் தெலுங்கிலேயே வெளியிடப்பட்டது. மூன்று மாநிலங்களிலும் படம் மிகப்பெரிய வரவேற்பைப் பெற்றது.

ஆந்திராவில் 18 திரையரங்குகளில் 200 நாட்களுக்கும் மேலாக ஓடிய இந்த படம், அங்கு 450 நாட்களுக்கு மேல் திரையிடப்பட்டது. அதேபோல், பெங்களூருவில் உள்ள கல்பனா திரையரங்கில் 693 நாட்கள் தொடர்ந்து ஓடி சாதனை படைத்தது. மைசூரில் உள்ள காயத்ரி திரையரங்கில் 350 நாட்களும், சென்னை சபையர் திரையரங்கில் 596 நாட்களும், கோவை ராயல் திரையரங்கில் 450 நாட்களும் ஓடியது.

இந்த திரைப்படத்தின் மூலம் நடிகை சரிதா சினிமாவுக்கு அறிமுகமானார். அப்போது அபிலாஷா என்ற பெயரில் இருந்த அவரை கே.பாலசந்தர் தேர்வு செய்து, ‘சரிதா’ என்று பெயர் மாற்றி நடிக்க வைத்தார். பலரை தேர்வு செய்தும் திருப்தியடையாத பாலசந்தர், இறுதியாக சரிதாவையே கதாநாயகியாக தேர்வு செய்தது பின்னாளில் சரியான முடிவாக அமைந்தது.

‘மரோ சரித்திரா’ திரைப்படம் தமிழ்நாடு மற்றும் கர்நாடகாவில் அதிக நாட்கள் ஓடிய தெலுங்கு திரைப்படம் என்ற சாதனையை இன்றும் தக்க வைத்துள்ளது. கமல்ஹாசன் மற்றும் கே.பாலசந்தர் இணைந்த இந்த திரைப்படம், இந்திய சினிமாவின் மறக்க முடியாத கிளாசிக் படைப்பாக இன்னும் கொண்டாடப்படுகிறது.