வணிகம்
2026ம் ஆண்டில் இந்தியாவின் பொருளாதார வளர்ச்சி 6.5% என உலக வங்கி கணிப்பு!
புதுடில்லி: 2026ம் நிதியாண்டில் இந்தியாவின் பொருளாதார வளர்ச்சி 6.5 சதவீதமாக இருக்கும் என உலக வங்கி தெரிவித்துள்ளது.
இதுகுறித்து உலக வங்கி வெளியிட்டுள்ள சமீபத்திய அறிக்கையில் கூறியிருப்பதாவது:
“இந்தியா உலகில் மிக வேகமாக வளர்ந்து வரும் முக்கிய பொருளாதார நாடாக தொடர்ந்து திகழ்கிறது. 2026ம் நிதியாண்டில் இந்தியாவின் பொருளாதார வளர்ச்சி 6.5 சதவீதம் என எதிர்பார்க்கப்படுகிறது. இதற்கு வலுவான நுகர்வோர் செலவினம், மேம்பட்ட வேளாண்மை உற்பத்தி, கிராமப்புற ஊதிய உயர்வு ஆகியவை முக்கிய காரணமாகும்” என தெரிவிக்கப்பட்டுள்ளது.
அதே அறிக்கையில், தெற்காசிய நாடுகளின் பொருளாதார வளர்ச்சி குறித்து கூறப்பட்டுள்ளது. அதன்படி,
- வங்கதேசத்தின் வளர்ச்சி 4.8%
- பூடானின் வளர்ச்சி 7.3%
- மாலத்தீவின் வளர்ச்சி 3.9%
- நேபாளத்தின் வளர்ச்சி 2.1% என கணிக்கப்பட்டுள்ளது.
மேலும், அமெரிக்கா இந்திய ஏற்றுமதிகளுக்கு விதித்துள்ள 50% வரிகள், வரும் ஆண்டுகளில் நாட்டின் பொருளாதாரத்தை பாதிக்கக்கூடும் எனவும் குறிப்பிடப்பட்டுள்ளது. இதன் விளைவாக, 2026-27ம் ஆண்டிற்கான மொத்த உள்நாட்டு உற்பத்தி (GDP) வளர்ச்சி 6.3% ஆக குறையக்கூடும் என எதிர்பார்க்கப்படுகிறது.
இருப்பினும், உள்நாட்டு உற்பத்தி, குறிப்பாக விவசாய உற்பத்தி மற்றும் கிராமப்புற ஊதிய வளர்ச்சி எதிர்பார்த்ததை விட சிறப்பாக இருப்பதால், இந்தியா தனது வளர்ச்சியை நிலைநிறுத்தும் திறன் கொண்டதாக உலக வங்கி வலியுறுத்தியுள்ளது.
தெற்காசியாவின் மொத்த வளர்ச்சி 2025ம் ஆண்டில் 6.6% இருந்தது 2026ம் ஆண்டில் 5.8% ஆக குறையும் எனவும், பணவீக்கம் கட்டுக்குள் இருப்பதாகவும் அறிக்கையில் கூறப்பட்டுள்ளது.
கடந்த ஜூன் மாதத்தில் 2026ம் ஆண்டிற்கான இந்தியாவின்
வளர்ச்சியை 6.3% என உலக வங்கி கணித்திருந்த நிலையில், தற்போதைய அறிக்கையில் அதை 6.5% ஆக உயர்த்தியுள்ளது குறிப்பிடத்தக்கது.
