லஞ்சம் கேட்ட அரசு ஊழியர்களை புகார் அளித்தால் ரூ.1 லட்சம் பரிசு.. தமிழக அரசின் அதிரடி அறிவிப்பு!

தமிழகத்தில் லஞ்ச ஊழலை முழுமையாக கட்டுப்படுத்தும் நோக்கில், அரசு ஊழியர்கள் லஞ்சம் கேட்டால் ஆதாரங்களுடன் புகார் அளிக்கும் பொதுமக்களுக்கு ரூ.1 லட்சம் சன்மானம் வழங்கப்படும் என தமிழக அரசு அதிரடி அறிவிப்பை வெளியிட்டுள்ளது.

முதல்வர் விஜய் தலைமையிலான புதிய த.வெ.க அரசு, அடுத்த மூன்று மாதங்களுக்குள் அரசு நிர்வாகத்தில் தூய்மையை உறுதி செய்வதாக ஏற்கனவே தெரிவித்திருந்தது. அதன் தொடர்ச்சியாக, ஊழலை அடிமட்டத்திலேயே ஒழிக்கும் நடவடிக்கையாக இந்த புதிய திட்டம் அறிவிக்கப்பட்டுள்ளது.

அரசு வெளியிட்டுள்ள அறிவிப்பின்படி, எந்த அரசு அலுவலகத்திலும் அதிகாரிகள் அல்லது ஊழியர்கள் லஞ்சம் கேட்டால், பொதுமக்கள் தயக்கமின்றி அதனை ஆடியோ, வீடியோ அல்லது ஆவண ஆதாரங்களுடன் லஞ்ச ஒழிப்புத்துறையிடம் புகாரளிக்கலாம். மிகச் சிறிய தொகையான ரூ.1000 லஞ்சம் கேட்டால்கூட நடவடிக்கை எடுக்கப்படும் என அரசு தெளிவுபடுத்தியுள்ளது.

சரியான ஆதாரங்களுடன் ஊழல் சம்பவங்களை வெளிக்கொண்டு வரும் பொதுமக்களுக்கு அரசு தரப்பில் இருந்து ரூ.1 லட்சம் பரிசுத் தொகை வழங்கப்படும் என்றும் தெரிவிக்கப்பட்டுள்ளது. இந்த அறிவிப்பு, அரசு துறைகளில் பணிபுரியும் ஊழல் அதிகாரிகளிடையே பெரும் அதிர்வலைகளை ஏற்படுத்தியுள்ளது.

தமிழக சட்டமன்றத் தேர்தலில் முக்கிய வெற்றி பெற்று கூட்டணிக் கட்சிகளின் ஆதரவுடன் ஆட்சியை அமைத்துள்ள முதல்வர் விஜய், லஞ்ச ஊழலுக்கு எதிராக கடுமையான நடவடிக்கைகள் எடுக்கப்படும் என முன்பே உறுதியளித்திருந்தார். கடந்த 16-ஆம் தேதி அமைச்சர்களுக்கு இலாகாக்கள் ஒதுக்கப்பட்டு, அவர்கள் பொறுப்பேற்ற நிலையில் தற்போது இந்த அறிவிப்பு வெளியாகியுள்ளது.

அரசின் இந்த புதிய திட்டம் மூலம் பொதுமக்கள் நேரடியாக ஊழலை எதிர்க்கும் சூழல் உருவாகும் என்றும், அரசு அலுவலகங்களில் வெளிப்படைத்தன்மை அதிகரிக்கும் என்றும் எதிர்பார்க்கப்படுகிறது.