உலகம்
எம்பயர் எஸ்டேட் கட்டிடத்தை விட 20 மடங்கு பெரிது.. சவுதி அரேபியாவில் உருவாகும் பிரமாண்ட கட்டிடம்..!
நியூயார்க்கில் உள்ள எம்பயர் எஸ்டேட் என்ற கட்டிடம் உலகின் மிகப்பெரிய கட்டிடங்களில் ஒன்றாக இருக்கும் நிலையில் அதை விட 20 மடங்கு பெரிய கட்டிடம் ஒன்று சவுதி அரேபியாவில் கட்ட திட்டமிடப்பட்டுள்ளதாக வெளிவந்திருக்கும் செய்தி பெரும் பரபரப்பை ஏற்படுத்தியுள்ளது.
சவுதி விஷன் 2030 என்ற திட்டத்தின் ஒரு பகுதியாக ரியாத் நகரில் உலகின் மிகப்பெரிய நவீன கட்டிடம் ஒன்று கட்ட இருப்பதாகவும் இது ஒரு நகரத்திற்கு இணையாக இருக்கும் என்றும் கூறப்படுகிறது. ரியாத் நகரின் வடமேற்கில் அமைய இருக்கும் இந்த கட்டிடம் 19 சதுர கிலோமீட்டர் பரப்பளவில் கட்டப்படும் என்று கூறப்படுகிறது.
1,04,000க்க்கும் மேற்பட்ட குடியிருப்புகள் 9000 ஹோட்டல் அறைகள் மற்றும் பல முக்கிய அம்சங்கள் இந்த கட்டிடத்தில் இடம்பெறும் என்றும் கூறப்படுகிறது. முரப்பா டெவலப்மென்ட் நிறுவனம் இந்த திட்டத்தை உருவாக்க திட்டமிட்டுள்ளதாகவும் இந்த கட்டிடத்திற்கு ’முகாப்’ என்று பெயரிடப்பட்டுள்ளதாகவும் கூறப்படுகிறது. அரபு மொழியில் ’முகாப்’ என்றால் கன சதுரம் என்ற பொருள் என தெரிகிறது. பெயருக்கு ஏற்றவாறு இந்த கட்டிடம் 400 மீட்டர் உயரம், 400 மீட்டர் அகலம் மற்றும் 400 மீட்டர் நீளம் கொண்டதாக சதுர வடிவமாக இருக்கும் என்றும் உலகின் மிகப்பெரிய உட்புற நகரமாக இந்த கட்டிடம் இருக்கும் என்றும் டெவலப்பர்கள் கூறுகின்றனர்.
இந்த பிரம்மாண்டமான கன சதுரத்தின் உள்ளே பாரம்பரிய கட்டிடக்கலை பாணி இருக்கும் என்றும் டிஜிட்டல் மற்றும் மெய் நிகர் தொழில்நுட்பத்தின் மூலம் சமீபத்தில் ஹாலோகிராபிக்ஸ் மூலம் இந்த கட்டிடத்தின் டிசைன் உருவாக்கப்பட்டது என்றும் கூறப்படுகிறது.
பசுமையான பகுதிகள், நடைப்பயிற்சி மற்றும் சைக்கிள் ஓட்டுவதற்கான பாதைகள், சுறுசுறுப்பான வாழ்க்கை முறைக்கு தேவையான அனைத்து வசதிகள், வாழ்க்கை தரத்தை மேம்படுத்தும் அம்சங்களும் இருக்கும் என்றும் கூறப்படுகிறது. மேலும் இந்த கட்டிடத்தின் உள்ளே அருங்காட்சியகம், தொழில்நுட்பம் மற்றும் அம்சங்களைக் கொண்டது என்றும் திரையரங்குகள் மற்றும் பொழுதுபோக்கு கலாச்சார அரங்குகளும் இருக்கும் என்றும் சவுதி அரேபியாவின் அதிகாரி ஒருவர் தெரிவித்துள்ளார்.
சவுதி அரேபியாவில் கடந்த சில ஆண்டுகளாக ரியல் எஸ்டேட் துறையில் மிகுந்த கவனம் செலுத்தப்பட்டு வரும் நிலையில் அதன் ஒரு முக்கிய பங்காக இந்த கட்டிடம் இருக்கும் என்று கூறப்படுகிறது. 2030 ஆம் ஆண்டில் இந்த கட்டிடம் கட்டி முடிக்கப்படும் என்று எதிர்பார்க்கப்படுகிறது. இந்த திட்டத்தின் மொத்த மதிப்பு 500 பில்லியன் டாலர் என்றும் சவுதி அரேபியாவில் உள்ள ஒரு மெகா நகரம் போல் உருவாகும் இந்த கட்டிடத்தில் உள்ள தெருக்கள், சாலைகளில் பூஜ்ஜியம் கார்பன் கொள்கை கடைபிடிக்கப்படும் என்றும் கூறப்படுகிறது.
HRH Crown Prince announced today the launch of the New Murabba Development Company, chaired by His Royal Highness, to develop the world’s largest modern downtown in Riyadh.#NewMurabba
Learn More: https://t.co/b4qIaoY6Wa pic.twitter.com/f1hOQvZJic
— Public Investment Fund (@PIF_en) February 16, 2023