ரிசர்வ் வங்கியின் புதிய நகை கடன் விதிகள்: தங்கத்துடன் வெள்ளியையும் அடமானம் வைத்து கடன் பெறலாம்!

இந்திய ரிசர்வ் வங்கி சமீபத்தில் வெளியிட்டுள்ள புதிய நகை கடன் கட்டமைப்பு, வாடிக்கையாளர்களுக்கு பெரும் நிவாரணத்தை வழங்கும் வகையில் அமைந்துள்ளது. இதன் மூலம் தங்கம் மட்டுமல்லாது, வெள்ளி நகைகள் மற்றும் நாணயங்களையும் அடமானம் வைத்து கடன் பெற முடியுமென அறிவிக்கப்பட்டுள்ளது.

வரும் 2026 ஏப்ரல் 1ஆம் தேதி முதல் அமலுக்கு வரவுள்ள இந்த புதிய திட்டம், கோடிக்கணக்கான மக்களின் நிதிசுமையை குறைக்கும் முக்கியமான முன்னேற்றமாகக் கருதப்படுகிறது. இதன் மூலம் வங்கிகள் மற்றும் வங்கி அல்லாத நிதி நிறுவனங்களில், வெள்ளி நகைகள் மற்றும் நாணயங்களை அடகு வைத்து குறுகிய கால கடன் பெற முடியுமென ரிசர்வ் வங்கி தெரிவித்துள்ளது.

🔹 முக்கிய மாற்றங்கள்:

• தங்கத்துடன் இணையாக, இனி வெள்ளி ஆபரணங்கள் மற்றும் நாணயங்களையும் அடமானமாக வைத்து கடன் பெறலாம்.

• ஆனால் தங்க அல்லது வெள்ளி கட்டிகள், தங்க பத்திரங்கள் ஆகியவற்றை அடமானம் வைத்து கடன் பெற முடியாது.

• ஏற்கனவே அடகு வைக்கப்பட்ட நகைகளை மீண்டும் அடமானம் வைப்பது தடை செய்யப்பட்டுள்ளது.

• சிறு கடனாளர்களுக்கு உதவும் வகையில், கடன்-மதிப்பு விகிதம் (LTV ratio) 75%-இல் இருந்து 85%-ஆக உயர்த்தப்பட்டுள்ளது.

உதாரணமாக, உங்கள் வெள்ளி நகையின் மதிப்பு ரூ.1 லட்சம் என்றால், இனி நீங்கள் ரூ.85,000 வரை கடன் பெறலாம்.

🔹 அடகு வரம்பு:

• வெள்ளி: 10 கிலோ வரை ஆபரணங்கள் அல்லது 500 கிராம் வரை நாணயங்கள்.

• தங்கம்: 1 கிலோ வரை ஆபரணங்கள் மற்றும் 50 கிராம் வரை நாணயங்கள்.

🔹 வாடிக்கையாளர் பாதுகாப்பு விதிகள்:

ரிசர்வ் வங்கி வாடிக்கையாளர் நலனை கருத்தில் கொண்டு கடுமையான பாதுகாப்பு நடவடிக்கைகளையும் சேர்த்துள்ளது.

• கடன் முழுமையாக திருப்பிச் செலுத்தப்பட்டவுடன், அடகு நகைகள் உடனடியாக திருப்பி அளிக்கப்பட வேண்டும்.

• தாமதம் ஏற்பட்டால், ஒவ்வொரு நாளுக்கும் ரூ.5,000 அபராதம் வங்கியால் வாடிக்கையாளருக்கு வழங்கப்பட வேண்டும்.

• அடகு வைக்கப்பட்ட தங்கம் அல்லது வெள்ளி சேதமடைந்தாலோ, காணாமற்போனாலோ, அதன் முழு மதிப்பையும் நிதி நிறுவனம் இழப்பீடாக வழங்க வேண்டும்.

🔹 யாருக்கு அதிக நன்மை?

இந்த புதிய திட்டம் விவசாயிகள், சிறு வணிகர்கள் மற்றும் கிராமப்புற மக்களுக்கு பெரும் நன்மையை அளிக்கும். அவர்கள் தங்களிடம் உள்ள வெள்ளி பொருட்களை அடகு வைத்து அவசர நிதி தேவைகளை பூர்த்தி செய்ய முடியும்.

இந்த முயற்சி நிதி உள்ளடக்கத்தை (financial inclusion) மேம்படுத்தி, இந்தியாவின் பொருளாதார வளர்ச்சிக்கு புதிய திசையை வழங்கும் என நிபுணர்கள் கருதுகின்றனர்.