சந்திர கிரகணத்தையொட்டி நாகர்கோவில் நாகராஜா கோவிலில் மாலை 6.30க்கு பின் நடை சாத்தல் – பரிகார பூஜைகள் நடைபெறுகின்றன!

கன்னியாகுமரி மாவட்டத்தின் புகழ்பெற்ற நாகர்கோவில் நாகராஜா கோவில், நாகதோஷம் தீர்க்கும் புண்ணிய ஸ்தலங்களில் ஒன்றாக விளங்குகிறது. திருமணத்தடை, பிள்ளை பாக்கியம் உள்ளிட்ட தோஷ நிவாரணத்திற்காக ஏராளமான பக்தர்கள் இங்கு வந்து வழிபடுகின்றனர். இந்தியாவில் நாகரை மூலவராகக் கொண்ட ஒரே கோவிலாகும் இதன் சிறப்பு.

இங்கு சிவன் மற்றும் அனந்த கிருஷ்ணன் சிலைகளும், தூண்களில் தீர்த்தங்கர மகாவீரர் மற்றும் பார்சவநாதர் உருவங்களும் காணப்படுகின்றன. ஐந்து தலைகள் கொண்ட நாகராஜா சிலையின் காரணமாகவே இத்தலம் “நாகர்கோவில்” எனப் பெயர் பெற்றது. கோவிலின் தோட்டத்தில் வளரும் நாக மலர், நாகராஜாவின் அடையாளமாக வணங்கப்படுகிறது. மேலும், கோவில் வளாகத்தில் ஏராளமான பாம்புகள் இருந்தாலும், பாம்பு கடியால் யாரும் இறக்கவில்லை என்பது அற்புதமான சிறப்பாகும்.

ஆவணி மாத ஞாயிறு சிறப்பு வழிபாடுகள்
ஒவ்வொரு ஆவணி மாத ஞாயிற்றுக்கிழமையும் நாகராஜா கோவிலில் சிறப்பு வழிபாடுகள் நடைபெறும். பக்தர்கள் நாகசிலைகளுக்கு மஞ்சள் தூவி, பால் ஊற்றி வழிபடும் மரபும் இங்கு சிறப்பாகக் காணப்படுகிறது. இதற்காக கேரளா மற்றும் தமிழகத்தின் பல்வேறு பகுதிகளில் இருந்து பக்தர்கள் பெருமளவில் வந்து தரிசனம் செய்கின்றனர்.

சந்திர கிரகணம் காரணமாக சிறப்பு ஏற்பாடுகள்
இன்று (செப்டம்பர் 7) சந்திர கிரகணத்தை முன்னிட்டு, நாகராஜா கோவிலில் மாலை 6.30 மணி வரை மட்டுமே பக்தர்கள் தரிசனம் செய்ய அனுமதிக்கப்படுகின்றனர். பின்னர், பரிகார பூஜைகள் நடைபெற்று, திருநடை சாத்தப்படும் என கோவில் நிர்வாகம் அறிவித்துள்ளது. மாலை தரிசனம் மேற்கொள்ள முடியாததால், காலை முதலே பக்தர்கள் பெரும் திரளாக வந்து தரிசனம் செய்து வருகின்றனர்.

கன்னியாகுமரி மாவட்டத்தின் பல முக்கிய கோவில்களில் போலவே, நாகர்கோவில் நாகராஜா கோவிலும் இன்று மாலை நடை சாத்தப்பட்டு, நாளை வழக்கம்போல நடை திறக்கப்படும்.