EPF ஓய்வூதியதாரர்களுக்கு குட் நியூஸ்.. குறைந்தபட்ச பென்ஷன் ரூ.7,500 ஆக உயருமா? மத்திய அரசு பரிசீலனை!

ஊழியர்களின் நலனை கருத்தில் கொண்டு, ஊழியர் வருங்கால வைப்பு நிதி அமைப்பு (EPFO) கடந்த சில ஆண்டுகளாக பல முக்கிய மாற்றங்களை மேற்கொண்டு வருகிறது. குறிப்பாக, PF பணத்தை எடுக்கும் நடைமுறைகள் தற்போது மிகவும் எளிமையாக்கப்பட்டுள்ளன. இதனால் கோடிக்கணக்கான EPF உறுப்பினர்கள் பயனடைந்து வருகின்றனர்.

இந்நிலையில், EPS-95 திட்டத்தின் கீழ் வழங்கப்படும் குறைந்தபட்ச ஓய்வூதியத்தை தற்போதைய ரூ.1,000-லிருந்து ரூ.7,500 ஆக உயர்த்துவது குறித்து மத்திய அரசு தீவிரமாக பரிசீலித்து வருவதாக தகவல்கள் வெளியாகியுள்ளன.

EPF திட்டத்தின் கீழ், ஊழியர்கள் தங்களின் அடிப்படை சம்பளத்தின் 12 சதவீதத்தை PF கணக்கில் செலுத்துகின்றனர். அதேபோல், நிறுவனங்களும் சம அளவு தொகையை பங்களிக்கின்றன. இதில் முதலாளியின் பங்களிப்பில் 8.33 சதவீதம் ஊழியர்களின் ஓய்வூதியத் திட்டமான EPS-க்கு செல்கிறது. மீதமுள்ள 3.67 சதவீதம் EPF கணக்கில் சேர்க்கப்படுகிறது.

2025 பட்ஜெட்டிற்கு முன்பு, EPS-95 ஓய்வூதியதாரர்களின் தேசிய இயக்கக் குழு, மத்திய நிதியமைச்சர் Nirmala Sitharaman அவர்களை சந்தித்து முக்கிய கோரிக்கைகளை முன்வைத்தது. குறிப்பாக, மாதாந்திர குறைந்தபட்ச ஓய்வூதியத்தை ரூ.7,500 ஆக உயர்த்துவதோடு, அதனுடன் அகவிலைப்படியும் (DA) வழங்க வேண்டும் என்று கோரிக்கை வைக்கப்பட்டது.

இந்த கோரிக்கைகள் குறித்து அரசு பரிசீலனை செய்யும் என்று நிதியமைச்சர் உறுதியளித்துள்ளதாக EPS-95 அமைப்பினர் தெரிவித்துள்ளனர். இதனால் நாடு முழுவதும் உள்ள ஓய்வூதியதாரர்களிடையே எதிர்பார்ப்பு அதிகரித்துள்ளது.

தற்போதைய விதிமுறைகளின்படி, EPS ஓய்வூதியத் தொகை ஊழியரின் பணிக்காலம் மற்றும் ஓய்வூதியத்திற்குரிய சராசரி சம்பளத்தை அடிப்படையாகக் கொண்டு கணக்கிடப்படுகிறது. கடந்த 12 மாதங்களின் சராசரி அடிப்படை சம்பளம் மற்றும் அகவிலைப்படி ஆகியவை இதில் முக்கிய பங்கு வகிக்கின்றன.

ஆனால், இங்கே ஒரு முக்கியமான வரம்பும் உள்ளது. EPFO விதிகளின்படி, ஓய்வூதியக் கணக்கீட்டிற்கு அதிகபட்ச சம்பள வரம்பு ரூ.15,000 ஆக நிர்ணயிக்கப்பட்டுள்ளது. அதாவது, ஒருவரின் உண்மையான சம்பளம் அதைவிட அதிகமாக இருந்தாலும், EPS ஓய்வூதியம் ரூ.15,000 அடிப்படையிலேயே கணக்கிடப்படும்.

இந்த புதிய மாற்றம் அமலுக்கு வந்தால், ஓய்வூதியதாரர்களின் மாதாந்திர வருமானம் கணிசமாக உயரக்கூடும் என எதிர்பார்க்கப்படுகிறது.