ஆட்டோமொபைல்
இந்தியர்களின் வருமானம் அதிகரித்துவிட்டதா என்ன? இதுவரை இல்லாத அதிகளவில் BMW கார் விற்பனை!
2025ஆம் ஆண்டு BMW இந்தியாவுக்கு வரலாற்றுச் சிறப்புமிக்க ஆண்டாக அமைந்துள்ளது. ஜெர்மன் சொகுசு கார் தயாரிப்பு நிறுவனமான BMW India, கடந்த ஆண்டு மொத்தமாக 18,001 கார்களை விற்பனை செய்து, இதுவரை இல்லாத உயர்ந்த விற்பனையை பதிவு செய்துள்ளது. இது கடந்த ஆண்டுடன் ஒப்பிடும்போது 14% ஆண்டு வளர்ச்சி (YoY) ஆகும்.
இந்த மொத்த விற்பனையில் 17,271 BMW கார்களும், 730 MINI கார்களும் இடம்பெற்றுள்ளன. இதன் மூலம் BMW India, தொடர்ந்து நான்காவது ஆண்டாக இரட்டை இலக்க வளர்ச்சியை (double-digit growth) பதிவு செய்துள்ளது.
2025ஆம் ஆண்டின் ஒவ்வொரு காலாண்டிலும் BMW விற்பனை, இந்திய சொகுசு கார் சந்தையின் சராசரியை விட அதிகமாக இருந்ததாக நிறுவனம் தெரிவித்துள்ளது. குறிப்பாக அக்டோபர்–டிசம்பர் காலாண்டில் 6,023 கார்கள் விற்பனை செய்யப்பட்டு, 17%க்கும் அதிகமான ஆண்டு வளர்ச்சி பதிவு செய்யப்பட்டுள்ளது. இது BMW India-வின் ஒரு காலாண்டுக்கான மிக உயர்ந்த விற்பனை ஆகும்.
SUV விற்பனை முக்கிய காரணம்
BMW India-வின் இந்த அபார வளர்ச்சிக்கு முக்கிய காரணமாக இருந்தது அதன் SUV (Sports Utility Vehicle) வரிசை. 2025ல் BMW SUV விற்பனை 22% YoY வளர்ச்சியுடன் 10,748 யூனிட்கள் ஆக உயர்ந்தது. இது நிறுவனத்தின் மொத்த கார் விற்பனையில் 60% பங்கு வகிக்கிறது.
SUV பிரிவில் BMW X1 அதிகம் விற்பனையான மாடலாக முதலிடம் பிடித்தது. இதனைத் தொடர்ந்து BMW X5 முக்கிய பங்கு வகித்தது.
EV விற்பனையில் BMW-யின் ஆதிக்கம்
மின்சார வாகனங்கள் (EV) பிரிவிலும் BMW India தனது முன்னணியை உறுதிப்படுத்தியுள்ளது. 2025ல் BMW மற்றும் MINI இணைந்து 3,753 மின்சார வாகனங்களை விற்பனை செய்து, 200%க்கும் அதிகமான YoY வளர்ச்சியை பதிவு செய்துள்ளன.
EVகள், BMW India-வின் மொத்த விற்பனையில் 21% பங்கைக் கொண்டுள்ளன. இது 2024ல் இருந்த 8% என்ற அளவிலிருந்து பெரும் உயர்வாகும்.
BMW iX1, BMW-யின் மட்டுமல்லாமல் இந்தியாவின் பிரீமியம் EV பிரிவிலேயே அதிகம் விற்பனையான மாடலாக திகழ்கிறது.
புதிய தயாரிப்புகள் மற்றும் Motorrad வளர்ச்சி
2025ல் BMW Group India, அதன் Motorrad (இருசக்கர வாகனம்) பிரிவையும் சேர்த்து, 20 புதிய தயாரிப்புகளை இந்திய சந்தையில் அறிமுகப்படுத்தியது. இதில் BMW iX1 Long Wheelbase, BMW X3, BMW 2 Series Gran Coupe, MINI JCW Countryman All4, MINI Convertible போன்றவை முக்கியமானவை.
BMW Motorrad பிரிவில், 2025ல் 5,841 மோட்டார் சைக்கிள்கள் விற்பனையானது. இதில் BMW G 310 RR அதிகம் விற்பனையான மாடலாக இருந்து, 24%க்கும் அதிகமான வளர்ச்சியை பதிவு செய்தது.
இந்திய சந்தையில் விரிவாக்கம்
2026 ஜனவரி 8 நிலவரப்படி, BMW Group India, BMW, MINI மற்றும் Motorrad பிராண்டுகளுக்காக 40 நகரங்களில் 97 டச் பாயிண்ட்களை இயக்கி வருகிறது. 2026ல் மேலும் 18 நகரங்களில் 19 புதிய ஷோரூம்கள் மற்றும் சேவை மையங்களை தொடங்க திட்டமிட்டுள்ளதாக நிறுவனம் அறிவித்துள்ளது.
