விஜய், கமல் படங்களை உறுதி செய்த வெற்றிமாறன்: குவிய போகுது தேசிய விருதுகள்!

கமல்ஹாசன் மற்றும் விஜய்யுடன் இணைந்து படம் இயக்குவது உறுதி என்று பேட்டி ஒன்றில் வெற்றிமாறன் கூறியுள்ளதை அடுத்து மீண்டும் தேசிய விருதுகளை குவிக்க வாய்ப்பு இருப்பதாக ரசிகர்கள் கருத்து தெரிவித்து வருகின்றனர்.

பிரபல இயக்குனர் வெற்றிமாறன் தற்போது சூரி நடித்து வரும் ’விடுதலை’ என்ற திரைப்படத்தை இயக்கி வருகிறார் என்பதும், இந்த திரைப்படத்தின் முக்கிய கேரக்டரில் விஜய் சேதுபதி நடித்து வருகிறார் என்பது குறிப்பிடத்தக்கது.

இந்த நிலையில் ’விடுதலை’ படத்தை முடித்தவுடன் அவர் சூர்யா நடிக்கும் ’வாடிவாசல்’ திரைப்படத்தை இயக்க உள்ளார் என்பதும் இந்த படத்தின் ஆரம்பகட்ட பணிகள் நடைபெற்று வருவதாகவும், இந்த படத்தில் அமீர் நடிக்க உள்ளதாகவும் அந்த பேட்டியில் இயக்குனர் வெற்றி மாறன் கூறியுள்ளார். மேலும் இந்த திரைப்படம் ஹிந்தி போராட்டம் குறித்த காட்சிகளையும் அடங்கி இருக்கும் என்றும் அவர் தெரிவித்துள்ளது பரபரப்பை ஏற்படுத்தி உள்ளது

இந்த நிலையில் விஜய்யை சந்தித்து ஒரு திரைப்படம் குறித்து பேச்சுவார்த்தை நடத்தியது உண்மைதான் என்றும் என்னுடைய மற்ற படங்களை முடித்துவிட்டு வாருங்கள் என்று விஜய் கூறியுள்ளதாகவும், விஜய்யுடன் இணைந்து படம் இயக்கும் வாய்ப்பு எனக்கு கிடைத்தது மிகப்பெரிய மகிழ்ச்சி என்றும் வெற்றிமாறன் அந்த பேட்டியில் கூறியுள்ளார்

அதேபோல் கமல்ஹாசனை சமீபத்தில் சந்தித்த போது என்னுடைய ஒர்க்கிங் ஸ்டைல் குறித்து அவர் கேட்டதாகவும் கண்டிப்பாக இருவரும் இணைந்து ஒரு படம் பண்ணுவோம் என்று கமல்ஹாசன் உறுதி அளித்ததாகவும் வெற்றி மாறன் கூறியுள்ளார்

எனவே தமிழ்த் திரையுலகின் முன்னணி நடிகர்களான கமல்ஹாசன் மற்றும் விஜய்யுடன் முன்னணி இயக்குனரான வெற்றிமாறன் மிக விரைவில் இணையஉள்ளது உறுதி செய்யப்பட்டுள்ளதாக இந்த பேட்டியின் மூலம் தெரியவருகிறது.