பாகிஸ்தானில் தக்காளி விலை மாதத்தில் 400% உயர்வு – மக்களின் வாழ்க்கை சிரமத்தில்!

பாகிஸ்தானில் சமீபத்தில் அத்தியாவசிய பொருட்களின் விலை பரவலாக உயர்ந்துள்ள நிலையில், தக்காளியின் விலை ஒரு மாதத்தில் 400% உயர்ந்துள்ளது. தற்போது அங்கு ஒரு கிலோ தக்காளி ரூ.600க்கு விற்கப்படுகிறது.

தொடர்ச்சியான பணவீக்கம், ஆப்கானிஸ்தானுடனான வர்த்தக நிறுத்தம், மற்றும் இந்தியாவுடனான அரசியல் பிரச்சினைகள் ஆகியவை பாகிஸ்தானின் பொருளாதாரத்தை கடுமையாக பாதித்துள்ளன. இதனால் அங்குள்ள மக்களின் அன்றாட வாழ்க்கை சிரமமடைந்துள்ளது.

பாகிஸ்தானின் நாடாளுமன்றத்தில் தக்காளி விலை உயர்வை எதிர்த்து கடும் விவாதம் எழுந்தது. ஒரு எம்.பி. ஒருவர் நாடாளுமன்றத்தில் தக்காளியை காட்டி, “இந்த தக்காளியை இங்கு கொண்டு வருவதற்கே பெரும் சவாலாக உள்ளது. இதன் விலை ரூ.75!” என்று விமர்சித்தார்.

தற்போது அங்கு தக்காளி கிலோ ரூ.600, பூண்டு ரூ.400, இஞ்சி ரூ.750, பட்டாணி ரூ.500 என விலை எட்டியுள்ளது. இதனால் சாதாரண மக்கள் தங்களின் அடிப்படை உணவுகளையே வாங்க முடியாத நிலை ஏற்பட்டுள்ளது.

இந்தியாவிலிருந்து இறக்குமதி நிறுத்தப்பட்டதைத் தொடர்ந்து பாகிஸ்தான், ஆப்கானிஸ்தானில் இருந்து காய்கறிகளை இறக்குமதி செய்து வந்தது. ஆனால் இரு நாடுகளுக்கிடையே ஏற்பட்ட எல்லை மோதல்கள் காரணமாக அந்த வர்த்தகமும் நிறுத்தப்பட்டுள்ளது. இதுவே விலை உயர்வுக்கு முக்கிய காரணமாகும் என பொருளாதார நிபுணர்கள் கூறுகின்றனர்.

பாகிஸ்தானின் தற்போதைய பொருளாதார நெருக்கடி பொதுமக்களை கடுமையாகப் பாதித்து, அங்குள்ள அரசாங்கத்தின் மீதான அதிருப்தியை அதிகரித்துள்ளது.