சபாஷ் சரியான போட்டி; தேனியில் ஓபிஎஸ் மகனை எதிர்த்து தங்க தமிழ்செல்வன்: அமமுக அதிரடி

மக்களவை தேர்தலை தமிழகத்தில் அதிமுக, திமுக கட்சிகள் மெகா கூட்டணிகள் அமைத்து சந்திக்கின்றன. ஆனால் டிடிவி தினகரனின் அம்மா மக்கள் முன்னேற்றக் கழகம் பெரிய கூட்டணி அமைக்காமல் எஸ்டிபிஐ கட்சிக்கு மட்டும் ஒரு தொகுதியை ஒதுக்கிவிட்டு மீதமுள்ள அனைத்து தொகுதிகளிலும் தனித்து போட்டியிடுகிறது.

இதற்காக முன்னதாக முதற்கட்ட வேட்பாளர்கள் பட்டியலை வெளியிட்டார் அமமுக துணைப் பொதுச்செயலாளர் டிடிவி தினகரன். இந்நிலையில் தற்போது இரண்டாம் கட்ட வேட்பாளர்கள் பட்டியலை வெளியிட்டுள்ளார் அவர். 14 மக்களவை தொகுதிகள் மற்றும் 5 சட்டசபை இடைத்தேர்தலுக்கான வேட்பாளர்கள் பட்டியல் அதில் இடம் பெற்றுள்ளது.

இந்த வேட்பாளர் பட்டியலில் அமமுக முக்கிய தலைவர்களில் ஒருவரும் மாநில கொள்கை பரப்புச் செயலாளருமான தங்க தமிழ்செல்வன் தேனி மக்களவை தொகுதியில் போட்டியிடுவதாக அறிவிக்கப்பட்டுள்ளது. இவர் தகுதிநீக்கம் செய்யப்பட்ட எம்எல்ஏ, எனவே சட்டசபை இடைத்தேர்தலில் ஆண்டிப்பட்டி தொகுதியில் போட்டியிடுவார் என எதிர்பார்க்கப்பட்டது. ஆனால் அதிரடியாக மக்களவை தேர்தலில் தேனி தொகுதியில் களமிறக்கப்பட்டார்.

அதிமுக கூட்டணியில் தேனி தொகுதியில் துணை முதல்வரும் அதிமுக ஒருங்கிணைப்பாளருமான ஓபிஎஸ்-இன் மகன் ரவீந்திரநாத் போட்டியிடுகிறார். அவரை தோற்கடிப்பதற்காகவே அமமுகவின் முக்கிய தலைவரும், தேனி தொகுதியில் செல்வாக்கு மிக்கவரும், மக்களுக்கு நன்கு பரிட்சயமானவருமான தங்க தமிழ்செல்வன் அதிரடியாக களமிறக்கப்பட்டுள்ளார். இது அரசியல் வட்டாரத்தில் பரபரப்பை ஏற்படுத்தியுள்ளது.