அப்பல்லோவில் க.அன்பழகன்: உடல்நலக் குறைவால் அனுமதி!

திமுக பொதுச்செயலாளர் க.அன்பழகன் உடல்நலக்குறைவால் சென்னை ஆயிரம் விளக்கிலுள்ள அப்பல்லோ மருத்துவமனையில் நேற்றிரவு அனுமதிக்கப்பட்டுள்ளார்.

திராவிட இயக்கத்தின் மூத்த தலைவரான க.அன்பழகன் மறைந்த முன்னாள் முதல்வர் கலைஞர் கருணாநிதியின் நீண்டநாள் நண்பர். இவர் வயது முதிர்வின் காரணமாக வீட்டில் இருந்து ஓய்வெடுத்துவருகிறார். தனது தள்ளாதவயதிலும் திமுக தலைவர் கலைஞர் கருணாநிதியின் சிலை திறப்புவிழாவிற்கு வந்தார்.

இந்நிலையில் அவர் சளி தொல்லை காரணமாக சென்னை ஆயிரம் விளக்கு அப்பல்லோ மருத்துவமனையில் நேற்று இரவு அனுமதிக்கப்பட்டார். இதனை அறிந்த திமுக தலைவர் ஸ்டாலின், பொருளாளர் துரைமுருகன், மாநிலங்களவை உறுப்பினர் கனிமொழி ஆகியோர் அப்பல்லோ மருத்துவமனைக்கு நேரில் சென்று க.அன்பழகனை நலம் விசாரித்தனர்.

பின்னர் செய்தியாளர்களைச் சந்தித்த திமுக தலைவர் ஸ்டாலின், நெஞ்சில் சிறிது தொற்று இருப்பதால் அதனை மருத்துவர்கள் கண்காணித்துவருகின்றனர். அதற்காகத்தான் மருத்துவமனையில் அனுமதிக்கப்பட்டிருக்கிறார். ஒரிரு நாட்களில் நலம் பெற்று வீடு திரும்புவார் என்றார்.